भक्तपुर । नेकपा एमालेका नेता महेश बस्नेतले पार्टीको दशौं राष्ट्रिय महाधिवेशनमा सचिव पदमा उम्मेदवारी दिने घोषणा गरेका छन् ।

भक्तपुर मध्यपुरथिमिको सम्पर्क कार्यालयमा सोमवार आफ्नो धारणा सार्वजनिक गर्दै उनले सचिव पदमा उम्मेदवारी दिने घोषणा गरेका हुन् । पूर्वमन्त्रीसमेत रहेका बस्नेत एमाले अध्यक्ष केपी शर्मा ओलीको विश्वासपात्र मानिन्छन् ।

एमाले विभाजनकाबेला बस्नेत ओलीका पक्षमा देशब्यापीमा अभियानमा हिँडेका थिए । एमाले युवा संगठनकोसमेत नेतृत्व सम्हालिसकेका उनी एमाले युवा पुस्तामा पनि लोकप्रिय छन् ।

अध्यक्ष केपी शर्मा ओली र एमालेको रक्षा कवचको रुपमा मुलुकको युवा शक्तिलाई परिचालन गर्न आफूले सचिव पदमा उम्मदवारी दिन लागेको उनले बताए ।

बस्नेतले आफूले पार्टीको सचिवमा उम्मेदवारी दिनका लागि केही आधारहरुसमेत प्रस्तुत गरेका थिए । एमाले अध्यक्षमा नेता भीम रावलले उम्मेदवारी घोषणा गरिसकेका छन् । एमालेको महाधिवेशन मंसिर १० देखि १२ गतेसम्म चितवनमा हुँदैछ ।