काठमाडौँ । नेकपा एमालेको जारी १० औँ महाधिवेशनको तेस्रो दिनको बन्दसत्र पुनः सरेको छ । आइतबार बिहान १० बजे बस्ने भनिएको बैठक राति ७ बजेसम्म बस्न नसकेको हो ।

बिहानै सुरु हुने भनिएको बैठक राति ७ बजेसम्म बस्न नसकेपछि पुनः ८ बजेका लागि सारिएको एमाले नेता शेरबहादुर तामाङले जानकारी दिए । उनका अनुसार केन्द्रीय सदस्यको क्लस्टर मिलाउन पर्ने भएकाले बैठक पुनः एक घण्टा सरेको हो ।

सहमतिबाट नेतृत्व चयन गर्ने तयारी गरिरहेका एमालेका अध्यक्ष केपी शर्मा ओलीले आफू बसेको होटलमा पार्टीका नेताहरुसँग छलफल गरिरहेका छन् ।

अध्यक्ष ओलीले सहमतिमै नेतृत्व चयन गर्ने पहल गरेका छन् भने उपाध्यक्ष भिम रावलले उनलाई टक्कर दिँदै अध्यक्षमा उम्मेदवारी दिने बताउँदै आएका छन् ।