काठमाडौँ । नेपाली कांग्रेसको आगामी महाधिवेशनमा आफ्नो पक्षबाट सभापतिमा एक जना मात्रै उम्मेदवार तय गर्न नेपाली कांग्रेसका वरिष्ठ नेता रामचन्द्र पौडेलले आज बैठक बोलाएका छन् । सोमबार साँझ पौडेल निवास बोहराटारमा उनीसहित महामन्त्री शशांक कोइराला, पूर्वमहामन्त्री प्रकाशमान सिंह र केन्द्रीय सदस्य शेखर कोइरालालाई बोलाएर छलफल गरेका थिए ।

दुई दिनमै सभापतिको उम्मेदवार तय गर्ने समझदारीबीच आफूनिकट केन्द्रीय सदस्यसँग सुझाव लिन आज पनि पौडेल पक्षको बैठक बस्न लागेको हो । केन्द्रीय सदस्यहरूको बैठक पूर्वमहामन्त्री सिंह निवास चाक्सीबारीमा दिउँसो १ बजे बस्ने भएको छ ।

सभापतिमा पौडेल पक्षबाट उनीसहित शशांक, प्रकाशमान र शेखर आकांक्षी हुँदै आएका छन् । आफू पक्षका सबै नेताहरूसँग सुझाव लिएर सर्वसम्मत रूपमा सभापति तय गरिने पौडेल पक्षले जनाएको छ ।