काठमाडौं । नेपाली कांग्रेसको १४ औ महाधिवेशन शुक्रबारदेखि काठमाडौंमा शुरु हुँदैछ ।

महाधिवेशन शुरु हुन दुई दिन मात्रै बाँकी रहँदा पनि संस्थापन इतर पक्ष बरिष्ठ नेता रामचन्द्र पौडेल समूहले साझा उम्मेदवार तय गर्न नसकेपछि तीन दिनको प्रयास निरर्थक बनेको छ ।

पौडेलपक्ष तीनदेखि साझा उम्मेदवारटुंगो लगाउने भनेर पटक पटक जुटेको थियो । सभापतिमा पौडेल पक्षका चार आकांक्षी भए पनि दुई नेताको अडानले गर्दा तीन दिनसम्मको लगातारको बैठक निरर्थक बनेको हो । अन्तिम पटक दुई दिनअघि ४८ घण्टाभित्र साझा उम्मेदवार तय गर्ने निश्कर्षमा उनीहरु पुगेका थिए ।

बुधबार पूर्व महामन्त्री प्रकाशमान सिंह निवासमा बसेको बैठकमा दुई नेताको अडानले साझा उम्मेदवार टुंगो लगाउन नसकेको बैठकमा सहभागी नेता रामशरण महतले बताए ।

बुधबारको बैठकमा प्रकाशमान सिंहले आफ्नो अडान कायमै राख्दै आफूलाई सहयोग गर्न आग्रह गरेका थिए । ‘मलाई ब्याक हुन नभन्नुस् बरु मलाई सहयोग गर्नुस ।’– सिंहले नेताहरुलाई आग्रह गरेका थिए ।

यस्तै, पौडेल पक्षका अर्का नेता डा. शेखर कोइरालाले पनि सभापति नछोड्ने अडानमा रहेपछि बैठकले विहीबार विहान बस्ने गरि बिनानिष्कर्ष टुंगिएको नेता जीवन परियारले बताए । परियारका अनुसार विहीबार बस्ने युवा नेताहरू र जिल्ला सभापतिको सुझावका आधारमा निर्णय हुनेछ ।