माओवादी महाधिवेशनमा देउवाले भने– एमसीसी कहाँ छ राष्ट्रघाती ?

माओवादी महाधिवेशन

माओवादी महाधिवेशनमा देउवाले भने– एमसीसी कहाँ छ राष्ट्रघाती ?

देउवा भन्छन्– यो गठबन्धन अगाडि पनि जाओस्

मेरोन्यूज २०७८ पुष ११ गते १८:४२

काठमाडौं । प्रधानमन्त्री एवम् नेपाली कांग्रेसका सभापति शेरबहादुर देउवाले माओवादी केन्द्रको राष्ट्रिय महाधिवेशनमा एमसीसीबारे आफ्नो धारणा सार्वजनिक गरेका छन् ।

शुभकामना मन्तब्यको प्रारम्भमा संविधानको रक्षाकोबारेमा चर्चा गरेका प्रधानमन्त्री देउवाले मन्तब्यको अन्तिमतिर एउटा कुरा बोल्नै पर्ने भयो भनेर एमसीसीबारे धारणा सार्वजनिक गरेका हुन् ।

‘एमसीसी राष्ट्रघाती भन्ने गरिएको छ, एमसीसी कहाँ छ राष्ट्रघाती ?’ देउवाले भने, कहाँ लेख्या छ राष्ट्रघाती, पढ्नु पर्यो क्या ।’

उनले राष्ट्रघाती नै छ भने आफूले राष्ट्रघाती काम नगर्ने देउवाले स्पष्ट गरे । यदि यो राष्ट्रघाती नै छ भने मैले किन राष्ट्रघात गर्ने ? देउवाले प्रश्न गरे ।

देउवाले एमसीसीकाबारेमा सबै दलहरुबीच छलफल गरेर नै अघि बढ्ने बताए । तर उनले एमसीसी नेपालको हितमा रहेको भन्दै जोड दिए ।

‘एमसीसी एकदमै नेपालको हितमा छ । सित्तैमा आएको पैसा हो यो । किन खेर जान दिने ?’ देउवाले जोड दिए ।

प्रधानमन्त्री देउवाले पुष्पकमल दाहालकै अगुवाईमा संविधान बनेको भन्दै संविधान बनाउने कुरामा प्रचण्डको योगदान रहेको चर्चा गरे ।
उनले प्रचण्डको योगदानबाट नै यो संविधान बनेको भन्दै उनले संविधान उत्कृष्ट रहेको दाबी गरे ।

अधिकांश कार्यक्रममा छोटो बोल्ने देउवाले माओवादी महाधिवेशमा आफूले धेरै बोलेको समेत आफैले बताए ।

उनले अहिले पाँच दलीयप गठबन्धन बनेको चर्चा गर्दै यो गठबन्धन कसैको विरोधमा नभएको बताए ।

संसद भंग नहोस्, पूरा चलोस् भन्ने उद्देश्यले नै संविधान बनाइएको प्रधानमन्त्री देउवाको भनाइ थियो ।

संविधानको आधारमा नै पाँच दलीय गठबन्धन कसैंको खिलाफको गठबन्धन नभएको भन्दै ओलीलाई त्यसो नसोच्नसमेत आग्रह गरे ।
संसद बचाउनका लागि मात्रै गठबन्धन बनेको देउवाले स्पष्ट गरे । उनले यो गठबन्धन अझै अगाडि बढ्नुपर्ने बताए ।

‘म त के चाहन्छु भने अगाडि पनि यो गठबन्धन जाओस् ।’– देउवाले भने ।

प्रधानमन्त्री देउवाले शािन्त प्रक्रियाका केही कुराहरु बाँकी रहेको उल्लेख गर्दै त्यो सबै समाधान गरेर सदाका लागि स्थायी शान्ति होस् भन्ने आफूले चाहेको बताए ।