एमालेसँग पुनः एकता हुने प्रचण्डको संकेत

माओवादी महाधिवेशन

एमालेसँग पुनः एकता हुने प्रचण्डको संकेत

इमान्दारितापूर्वक बोलेको भन्दै प्रचण्डले गरे देउवाको प्रशंसा

मेरोन्यूज २०७८ पुष ११ गते १९:१७

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ ले एमालेसँग पुनः एकता हुने संकेत गरेका छन् ।

आइतबारबाट काठमाडौंमा सुरु भएको आठौं महाधिवेशनको उदघाटन सत्रमा बोल्दै प्रचण्डले एमालेसँग भएको एकताबारे पुनः समिक्षा गर्नुपर्ने बताए ।

उनले एमालेसँग पार्टी एकता गरेर गल्ती नगरेको एमाले महासचिव शंकर पोखरेलको कुरामा समर्थन जनाए ।

‘हामीले पार्टी एकता गरेर गल्ती गरेका थिएनौं । फेरि एकपटक आत्मसमिक्षा गरौं’, प्रचण्डले एमालेप्रति लक्षित गर्दै प्रश्न गरे, ‘हामी किन दुई ठाउँमा हुन पुग्यौं ?’

पार्टी एकता गर्नुको आफूहरुको उद्देश्य गलत नभएको नेता पोखरेलको भनाईमा प्रचण्डले समर्थन जनाए । प्रचण्डले यसबारेमा एमालेभित्र पनि पुनः समिक्षा गर्न आग्रह गरे ।

माओवादी अध्यक्ष प्रचण्डले महाधिवेशन उदघाटन समारोहमा बोलेका सबै नेताहरुको प्रशंसा गरे ।

उनले राप्रपादेखि क्रान्तिकारी माओवादी नेता सीपी गजुरेलको समेत प्रशंसा गरे । राप्रपा नेतृ कुन्ती शाहीले विचार नमिले पनि राष्ट्रियताको सवालमासँगै रहने भनी बताएको भन्दै प्रचण्डले प्रशंसा गरे ।

प्रचण्डले क्रान्तिकारी माओवादीका नेता सीपी गजुरेलको अभिब्यक्तिलाई आफूले गम्भीर ढंगले लिएको बताए । ‘यसअघि सीपीजीले तितो कुरा राख्नुहुन्थ्यो । आज उहाँको कुरा पनि गम्भीर ढंगले राख्नुभयो’, प्रचण्डले भने, ‘उहाँ बोलिसकेपछि तपाइँको नोट पनि रैछ, मलाइ दिन सक्नु हुन्छ भनेर मागेको थिएँ, उहाँले दिन्छु भन्नु भएको छ ।’

प्रचण्डले गजुरेलको अभिब्यक्ति ठूलो एतिहासिक सन्दर्भसहितको सकारात्मक सन्देशका रुपमा लिएको बताए ।

प्रचण्डले महाधिवेशनमा तयार गरेको दस्तावेजमा सबैभन्दा बढी आत्मालोचना आफ्नै गरेको पनि बताए ।