काठमाडौं । नेपाली कांग्रेसका महामन्त्री गगनकुमार थापाले पार्टीमा नेताहरूको वरीयताबारे सभापति शेरबहादुर देउवालाई विगत सम्झाए पनि अटेर गरेको बताएका छन् । डा.शेखर कोइराला समूहले अनामनगरस्थित बसेरा होटलमा गरेको समिक्षात्मक छलफल कार्यक्रममा थापाले देउवाले पार्टीमा एकलौटी निर्णय गर्दै पेलेर जाने नीति अपनाएपछि यस्तो बताएका हुन् ।

वरिष्ठ नेता रामचन्द्र पौडेल, प्रकाशमान सिंहतर्फ लक्षित गर्दै थापाले आफूहरूले गरेको प्रयासको नेताहरूले सम्मान नगरेको बताए । ‘हाम्रो प्रयासको नेताहरूले जुन सम्मान गर्नु पर्थ्यो त्यो भएन । हामी भाग होइन न्याय चाहान्छौँ,’ उनले भने, ‘समूह निरन्तर चलिरहन्छ र छलफल हुन्छ तर सभापतिको समूह हुनु हुँदैन ।’ उनका अनुसार अप्ठ्यारो अवस्थामा भएको अधिवेशनमा नैतिक रुपमा जित भएको छ । उनले ४० प्रतिशत मत ल्याएको शक्ति लाई इग्नोर गरेर पार्टी नचल्ने बताए ।