काठमाडौं । प्रधानमन्त्री कप टी–२० राष्ट्रिय क्रिकेट प्रतियोगिताअन्तर्गत मंगलबार भएको खेलमा सशस्त्र प्रहरी बलको एपिएफ क्लबले लगातार दोस्रो जित हात पारेको छ ।

त्रिवि मैदान कीर्तिपुरमा भएको मंगलबारको दोस्रो खेलमा समूह ‘बी’ को टिम एपीएफले बागमति प्रदेशलाई ७ विकेटले पराजित गरेको हो ।

१२६ रनको लक्ष्य पछ्याएको एपीएफले १८.४ ओभरमा ३ विकेटको क्षतिमा पूरा गर्यो । एपीएफका लागि लोकेश बमले अर्धशतक पार गरे भने प्रदीप ऐरीले नटआउट ३६ रन जोडे ।

बमले २४ बलमा १० चौका र १ छक्का हिर्काए। सन्दीप जोराले नटआउट १५ रन जोडे।

बलिङमा बागमतिका रामनरेश गिरी, रिजन ढकाल र प्रतिश जिसीले १–१ विकेट लिएका थिए ।

यसअघि मंगलबार भएको अर्को खेलमा प्रदेश २ ले गण्डकी प्रदेशलाई पराजित गरेको छ ।