काठमाडौं । बैंकिङ कसूर मुद्दाका फरार प्रतिवादी अम्बिका बुढाथोकीलाई प्रहरीले पक्राउ गरेको छ ।

टोखा नगरपालिका–३ धनेश्वर बस्ने नुवाकोट विदुर नगरपालिका–११ स्थायी वतन भएकी ४१ वर्षीया बुढाथोकीलाई प्रहरीले मंगलबार पक्राउ गरेको हो ।

अदालतको फैसलापछि फरार रहेकी उनलाई प्रहरी प्रधान कार्यालय केन्द्रीय अनुसन्धान ब्यूरो महाराजगञ्जबाट खटिएको प्रहरीले ललितपुर भैसेपाटीबाट पक्राउ गरेको हो ।

बैंकिङ कसूर मुद्दामा उच्च अदालत पाटनको २०७८ कात्तिक २३ गतेको फैसलाले १७ लाख ४२ हजार ८ सय ७७ रुपैयाँ जरिवाना र ६ दिन कैद सजाय ठहर गरेको थियो ।

उनले आफ्नो खातामा पर्याप्त मौज्दात रकम नभएको भन्ने जानी जानी पीडितलाई सिद्धार्थ बैंक लिमिटेडको शाखा कार्यालय धनेश्वर काठमाडौंमा रहेको उनको खाताबाट रकम भुक्तान हुनेगरी चेक दिएको ठहर गरी अदालतले कैद सजायको फैसला गरेको थियो ।