काठमाडौँ । भारतको पञ्जाब राज्यमा हालै सम्पन्न विधानसभा चुनावमा आम आदमी पार्टी (आप)ले अन्य शक्तिशाली तथा ठूला पार्टीहरूलाई पत्तासाफ गरको छ । उक्त राज्यमा एक पूर्व मुख्यमन्त्रीसमेत पाँच पूर्व मन्त्री, ५४ भारतीय जनता पार्टी (भाजपा), ३० कांग्रेस र २७ शिरोमणि दलका उम्मेदवारले जमानतसमेत गुमाएका छन् । जसमा एक केन्द्रीय मन्त्रीसमेत रहेका छन् ।

यसका साथै बसपाका १३, शिरोमणि अकाली दल (एस)का १४ उम्मेदवारले जमानत गुमाएका छन् । चुनावमा पूर्व मुख्यमन्त्री क्याप्टन अमरिन्दर सिंहले आफ्नो जमानत गुमाएका छन् । उनको पार्टी २८ सिटमा मात्रै चुनावमा सहभागी भएको थियो ।

भारतको विधानसभामा कूल मतको १६.७ प्रतिशत मत प्राप्त गर्न नसके उम्मेदवारको धरौटी जफत हुन्छ भनी व्याख्या गरिएको छ । विधानसभा चुनावमा सामान्य श्रेणीका उम्मेदवारका लागि १० हजार भारु र अनुसूचित जाति तथा जनजातिका उम्मेदवारका लागि पाँच हजार भारू जमानत राख्नु पर्ने व्यवस्था रहेको छ ।

जमानत जफत हुनेहरूमा सिंहसहित कांग्रेसका पूर्व मुख्यमन्त्री राजिन्दर कौर भट्टल (लाहरा), कृषि मन्त्री रणदीप सिंह नाभा (अमलोह), उद्योग मन्त्री गुरकीरत सिंह कोटली (खन्ना) र वनमन्त्री साधु सिंह धर्मसोत (नाभा) जस्ता प्रमुख र प्रतिष्ठित नेताहरू रहेका छन्।

कूल ११७ विधानसभा सिटमा भएको चुनावमा ९२ सिट आम आदमी पार्टी एक्लैले ल्याउँदै सबैभन्दा ठूलो दल बनेको छ । यस्तै कांग्रेसले १८ सिटमा जित हात पार्दै दोस्रो भएको छ ।

अकाली दलले ३ सिटमा जित हात पार्दा भाजपाले २ सिटमा मात्रै जित हात पारेको छ ।