काठमाडौँ । पोखराबाट जोमसोमका लागि उडेको तारा एयरको जहाज सवा २ घण्टादेखि सम्पर्कविहीन छ । म्याग्दी कटेर उकालो लागेपछि जहाज बेपत्ता भएको बताइएको छ ।

मुस्ताङ थासाङ क्षेत्रका स्थानीयले उक्त जहाज त्यहाँ दुईपटक घुमेको बताएका छन् । बादल लागेकाले नदेखिएको तर ठूलो आवाज आएको उनीहरूले बताएका छन् ।

‘यहाँका स्थानीयले आवाज सुनेका रहेछन्, प्रहरीले पनि त्यो आवाज सुनेको भन्ने छ,’ एक स्थानीय पत्रकारले भने, ‘बादलले टम्मै छ, कतै केही देखिँदैन, हल्का पानी परिरहेको छ ।’

अहिले प्रहरी लेते क्षेत्रमा केन्द्रीत भएर खोजीमा जुटेको छ । जहाजमा चालक दलका तीन सदस्यसहित २२ जना थिए ।