काठमाडौँ । महाभियोग सिफारिस समितिमा बुधबार बयानका क्रममा निलम्बित प्रधानन्यायाधीश चोलेन्द्र शमशेर जबराले सात जनामाथि संगीन आरोप लगाएका छन् । उनले सर्वोच्च अदालतका चार न्यायाधीश र ३ कानून व्यवसायीमाथि आरोप लगाएका हुन् ।

उनले कायममुकायम प्रधानन्यायाधीश दीपककुमार कार्कीमाथि प्रधानन्यायाधीश पदको लोभ लागेको आरोप लगाए । यस्तै, न्यायाधीशहरू हरिकृष्ण कार्कीमाथि दोहोरो चरित्र देखाएको, प्रकाशमानसिंह राउतमाथि आचारणबारे आरोप र ईश्वरप्रसाद खतिवडामाथि संकेत गर्दै ‘इमेल पठाएको’ आरोप लगाए ।

यस्तै, जबराले नेपाल बार एशोसिएसनका तत्कालीन पदाधिकारीमाथि गम्भीर आरोप लगाएका छन् । उनले बारका निवर्तमान अध्यक्ष चण्डेश्वर श्रेष्ठ र महासचिव लिलामणि पौडेलमाथि न्यायाधीश पदमा भागवण्डा खोजेको आरोप लगाउन भ्याए । यस्तै, सर्वोच्च अदालत बार एसोसिएसनका अध्यक्ष पूर्णमान शाक्यमाथि मुद्दा मिलाउन सिफारिस गरेको आरोप लगाए ।

जबराले नाम लिएसँगै उनीहरूमाथि पनि महाभियोग सिफारिस समितिले बुझ्नु पर्ने जनाएको थियो । यसै क्रममा जबराले सर्वोच्च अदालतका सबै न्यायाधीशलाई समितिले बोलाएर धारणा लिनु पर्ने बताए ।