काठमाडौँ । कैलालीको लम्कीचुहा नगरपालिकाकी मेयर सुशिला शाहीले पत्रकारलाई बन्धक बनाएको घटनाप्रति प्रेस चौतारी कैलालीले ध्यानाकर्षण गराएको छ ।

न्यूज २४ टेलिभिजनको सुदूरपश्चिम प्रदेश ब्युरो कार्यालयमा कार्यरत पत्रकार तथा प्रेस चौतारी नेपालका प्रदेश कमिटी सदस्य स्वैम ढुंगानालाई मेयर शाहीले बन्धक बनाएर सञ्चार सामाग्रीसमेत नियन्त्रणमा लिएकी थिइन् । नगरपालिकाका सवारी साधन निजी घर निर्माणमा प्रयोग गरेको सूचना पाएपछि पत्रकार रिर्पोटिङ गर्न जाँदा बन्धक बनेका हुन् ।

प्राप्त सूचनाअनुसार मेयर शाहीले नगरपालिकाका सरकारी सवारी साधन दुरुपयोग गरी घर निर्माण कार्यमा प्रयोग गरेको पाइएपछि पत्रकारले क्यामेरामा भिडियो रेकर्ड गरिरहेका बेला उनलाई हातपात गर्दै नियन्त्रणमा लिइएको हो । उनलाई दुई घण्टासम्म बन्धक बनाएर गुण्डा गर्दी शैलीमा सबै भिडियो डिलिट गराएर दुव्र्यवहार गरेको प्रेस चौतारीले जारी गरेको विज्ञप्तिमा उल्लेख गरिएको छ ।

इलाका प्रहरी कार्यालयका प्रहरी निरीक्षकको कमाण्डको टोली सम्बन्धित स्थलमा पुग्दा प्रहरीकै अगाडि मेयर शाहीले समाचारका लागि लिइएको भिडियो डिलिट गराएकी थिइन् ।