काठमाडौं । सर्वाेच्च अदालतले सैनिक हिरासतमा बन्दी बनाइएका दुई कर्णेललाई अदालतमा उपस्थित गराउन आदेश दिएको छ ।

न्यायाधीश हरिप्रसाद फुयालको एकल इजलासले महासेनानी महेन्द्रजंग शाह र प्रमुख सेनानी कुलदीप तिम्सिनालाई तीनदिन भित्रमा सर्वोच्चमा उपस्थित गराउन बुधबार आदेश दिएको हो। उनीहरुलाई अर्थिक अनियमितताको आरोपमा नेपाली सेनाले नियन्त्रणमा लिएर हिरासतमा राखेको छ । तर जंगी अडडाले भने नियनत्रणमा राखेको नभई अनुसन्धान मात्र भईरहेको बताईएको छ ।

सर्वोच्चले नेपाली सेनासँग लिखित जवाफ समेत माग गरेको छ।

दुवैजनाको तर्फबाट बन्दीप्रत्यक्षीकरण रिटमा सर्वोच्चले बुधबार आदेश जारी गर्दै बन्दीसहित उपस्थित हुन सेनालाई आदेश दिएको हो।

नेपाली सेनाका उपरथी प्रेमप्रकाश शाहीमाथि आर्थिक अनियमितताको आरोपमा अनुसन्धान गर्न कोर्टअफ इन्क्वेरी गठन भएको थियो। सोही कोर्ट अफ इन्क्वारीले अनुसन्धानका क्रममा आर्थिक अनियकितता भएको पाइएको र यी दुई कर्णेलको पनि संलग्नता देखिएको निस्कर्षसहित प्रतिवेदन दिएपछि सेनाले उनीहरुलाई पनि नियन्त्रणमा लिई हिरासतमा राखेको थियो ।

उपरथी शाही भने यसअघिदेखि नै हिरासतमा छन्। सर्वोच्चकै आदेश अनुसार सैनिक मुख्यालय फर्किएका उनलाई सेनाले फर्किएकै दिन पक्राउ गरेर थुनामा राखेको छ।