काठमाडौँ । अर्थमन्त्री डा. प्रकाशशरण महतले मुलुकको आवश्यक्तालाई सम्बोधन हुने गरी सरकारले आगामी आर्थिक वर्षको नीति तथा कार्यक्रम ल्याएको दाबी गरेका छन् ।

सरकारको नीति तथा कार्यक्रम प्रस्तुत भएलगत्तै उनले संघीय संसद भवन परिसरमा पत्रकारसँग मुलुकको आवश्यक्ताअनुसारको नीति तथा कार्यक्रम आएको बताएका हुन् ।

उनले नीति तथा कार्यक्रमलाई कार्यान्वयनमा लैजान दिनरात सरकारले काम गर्ने प्रतिबद्धता व्यक्त गरे । कार्यान्वयनका लागि आवश्यक क्षमता बढाउने र इमान्दारिताका साथ त्यसलाई कार्यान्वयनमा लैजान सरकार लाग्ने उनको भनाइ थियो ।

‘नयाँ भनेर कुनै आविष्कार गर्ने कुरा होइन, मूल कुरा जे आवश्यक्ता छ देशका लागि, ती कुराहरू सरकारको नीति तथा कार्यक्रममा आएका छन्, मैले फेरि पनि भनेँः कार्यान्वयन गर्ने हाम्रो क्षमता बढाउनु पर्‍यो,’ मन्त्री महतले भने, ‘इमान्दार हुनु पर्‍यो, रातदिन काम गर्नु पर्‍यो, त्यो काममा हामी लाग्छौँ, त्यसो भएपछि परिणाम आउन थाल्दछ, गर्ने कुरा यिनै हुन्, गरिएको कुरा पूरा गर्नु पर्‍यो, गर्छौं ।’

मन्त्री महतले सरकारको नीति तथा कार्यक्रम नयाँ आविष्कारको विषय नभएको र त्यसलाई त्यस रुपमा बुझुन नहुने बताए ।