काठमाडौं । प्रमुख प्रतिपक्षी दल नेकपा एमालेका नेता केपी शर्मा ओलीले संवैधानिक परिषद्ले नियुक्ति सिफारिस गर्नुपर्ने रिक्त पदहरूको एकमुष्ट सिफारिस गर्नुपर्ने अड्डी कसेपछि संवैधानिक परिषद्को बैठक विनानिष्कर्ष टुंगिएको छ ।

ओलीले परिषद्ले गर्नुपर्ने निर्णयसँगै संसदीय समितिका सभापतिहरूको टुंगो पनि लगाइनु पर्ने अडान बैठकमा लिएपछि प्रधानन्यायाधीश सिफारिसका लागि बसेको परिषद् बैठकले कुनै निर्णय लिन नसकेको हो ।

प्रधानमन्त्री तथा मन्त्रिपरिषद्को कार्यालय सिंहदरबारमा एक घण्टा ३५ मिनेट चलेको परिषद् बैठकमा परिषद्को सचिवालयले नयाँ प्रधानन्यायाधीश सिफारिस गर्ने कार्यसूची मात्रै ल्याएको थियो । तर, ओलीले अरु कार्यसूची खोई, सबै एकमुष्ट निर्णष् गर्नुपर्छ भनेर सुरुवात गरेका थिए ।

जवाफमा परिषद्को अध्यक्षता गर्ने प्रधानमन्त्री पुष्पकमल दाहालले प्रधानन्यायाधीशको सिफारिस तत्काल गर्नु पर्ने भएकाले यही मात्रै एजेण्डा बनाएको बताएका थिए । त्यसपछि ओलीले महालेखा परीक्षक रिक्त भएको झन दुई महिना बढी भइसकेको जवाफ दिएका थिए । ओलीको यो भनाइपछि प्रधानमन्त्री दाहाल अक्क न बक्क भएका थिए । ‘ओलीले महालेखा परीक्षकको सिफारिसको एजेण्डा खोइ भनेपछि प्रधानमन्त्रीले जवाफ दिन सक्नु भएन,’ बैठकमा सहभागी एक सदस्यले भने ।

सँगै ओलीले संसदीय समितिका सभापतिहरूको विषयमा पनि यसअघि भएको सहमति कार्यान्वयन हुनुपर्ने अडान राखेका थिए ।

बैठकमा सहभागी उपसभामुख ईन्दिरा रानाले सहमति नभएकाले कुनै पनि निर्णय नगरी साउन १८ गते बस्नेगरी आजको बैठक सकिएको जानकारी दिइन् ।

‘प्रधानन्यायाधीश सिफारिसको मात्रै प्रस्ताव आएको थियो। तर, बैठकमा विपक्षी दलका नेतालगायत अरू सदस्यहरूले संसदीय समिति र परिषद्ले सिफारिस गर्नुपर्ने तथा रिक्त रहेको महालेखा परीक्षक पनि एकैसाथ सिफारिस गर्नुपर्ने बताएपछि आज कुनै निर्णय भएन,’ उपसभामुख रानाले भनिन् ।

महालेखा परीक्षक टंकमणि शर्माको पदावधि जेठ ७ गते सकिएको थियो । त्यसपछि सो पद रिक्त छ । तर, परिषद्ले नयाँ महालेखा परीक्षक सिफारिस गरेको छैन । संविधानतः महालेखापरीक्षक रिक्त हुनुभन्दा एक महिना अगावै सिफारिस गर्नुपर्छ ।

प्रधानन्यायाधीश हरिकृष्ण कार्कीको पदावधि साउन २० गते सकिने भएकाले असार २० गते नै नयाँ प्रधानन्यायाधीश सिफारिस भइसक्नु पर्नेमा अहिलेसम्म सिफारिस भएको छैन ।

प्रधानन्यायाधीस्शमा सर्वोच्च अदालतका वरिष्ठतम न्यायाधीश विश्वम्भर श्रेष्ठ रोलक्रममा पहिलो नम्बरमा छन्।