काठमाडौँ । नेकपा एमालेका अध्यक्ष केपी शर्मा ओलीले सरकार आफैले दैनिक क्विन्टलका दरले सुन तस्करीमा लागेको आरोप लगाएका छन् ।
वामपन्थी नेता तुलसीलाल आमात्यको २६ औँ स्मृति दिवसका अवसरमा एमाले पार्टी कार्यालय च्यासलमा आयोजित कार्यक्रममा अध्यक्ष ओलीले सरकारले नै सुन तस्करी गराएको आरोप लगाएका हुन् ।

आफैले तस्करी गराएकाले सरकारले सुन तस्करी प्रकरणमा निष्पक्ष छानबिन नगर्ने ओलीको भनाइ छ ।

‘मजदुरी गर्न विदेश गएको एक सर्वसाधारण १० वर्ष पछि घर फर्किँदा आमालाई ल्याएको सिक्री एयरपोर्टबाट खोसेर लान्छ सरकार । तर दिनको क्विन्टल सुन तस्करी गराउँछ यो सरकारले’, ओलीले भने, ‘कसले गराउँछ यो ? किन बसेको त त्यहाँ ? तनखा खुवाएर किन मान्छे राखेको ?’

ओलीले सरकार आफू मुछिएकाले उच्चस्तरीय छानबिन समिति बनाउन नमानेको आरोप लगाए । ‘किन मान्दैन सरकार ? हामी छानबिन गर्दैछौ भन्छ । उहाँहरु आफै मुछिनुभएको छ । त्यो सिग्रेटमा ल्याएको साढे नौ किलो सुन जफत गरेर राखिएको थियो तर गोदामबाटै हरायो भनेर अहिले सुन्छु,’ ओलीले भने ।

सरकारले सुन तस्करीबारे संसद्‍मा गृहमन्त्री नारायणकाजी श्रेष्ठले जवाफ दिने वातावरण निर्माण गरौँ भन्दासमेत नमानेको बताए ।

विमानस्थलबाट एक सय किलो सुन भित्रिदा सबैले देखे पनि सरकारले नदेखेको बताए ।

यत्रो सुन तस्करीको विषय आउँदा सत्तारुढ दल नेपाली कांग्रेस नबोल्नुले आशंका उब्जाएको बताए । ओलीले कांग्रेस सभापति शेरबहादुर देउवालाई प्रश्न गर्दै भने, ‘म नेपाली कांग्रेसका सभापति शेरबहादुर देउवाजीलाई भन्न चाहन्छु । देउवाजी तपाईँले क्विन्टल क्विन्टल सुन तस्करी भएको सुन्नु भएको छ कि छैन ? के छ तपाईंको विचार ?’

एमालेले बाहेक अरूले देश चलाउनै नसक्ने दाबी गर्दै ओलीले भने, ‘दश टाउके भएर पनि चलाएनन् । हामी हुँदा त्यत्रो कोभिड हुँदा पनि देश तहसनहस हुन दिएका थिएनौँ । हामी हुँदा ३, ४ लाख विदेश गएका थिए अहिले ११ लाख गएका छन्’, ओलीले भने, ‘यति धेरै मान्छे विदेश गए पनि १० खर्व रेमिट्यान्स पनि आउँदैन ।’