काठमाडौं । अभिनेता अल्लु अर्जुनको हैदराबादस्थित घरमा तोडफोड भएको छ ।

उस्मानिया विश्वविद्यालयका विद्यार्थीहरूले अल्लुको घर बाहिर तोडफोड गरेका हुन् । यस घटनामा प्रहरीले ८ जनालाई पक्राउ गरेको छ ।

यी व्यक्तिहरु अभिनेताको घरमा जबरजस्ती पस्न खोजिरहेका थिए । उनीहरुलाई रोकेपछि घरबाहिर राखिएको गमलाहरु तोडेका थिए ।

सोमबार बिहान मुद्दामा संलग्न ६ अभियुक्तले जमानत पाएका छन्।

प्रहरीका अनुसार अल्लु अर्जुनको घरमा तोडफोड गर्ने ८ जनामध्ये ६ जनालाई आज बिहान हैदराबाद अदालतमा पेश गरिएको थियो, जहाँबाट उनीहरूले जमानत पाएका थिए। अदालतले अभियुक्तलाई जनही १० हजार रुपैयाँ धरौटी बुझाउन आदेश दिएको छ ।

पुष्प–२ को प्रिमियरका क्रममा सन्ध्या थिएटरमा भएको भागदौडमा मृत्यु भएका महिलाको परिवारलाई एक करोड क्षतिपूर्ति दिन विद्यार्थीले माग गरेका छन् ।

अभिनेताले मृतक रेवतीका परिवारलाई २५ लाख रुपैयाँ दिने बताइसकेका छन् । साथै घाइतेहरुको पनि आफ्नै खर्चमा उपचार भइरहेको बताएका छन् ।