काठमाडौँ ।  नेपाल पत्रकार महासङ्घ रासस प्रतिष्ठान शाखाले यस वर्षको ‘रासस पत्रकारिता पुरस्कार २०८१’ रासस केन्द्रीय कार्यालयका नेपाली समाचार सम्पादक विक्रम गिरी र फोटाेशाखाका सम्पादक किरण भट्टराईलाई प्रदान गर्ने निर्णय गरेको छ । 

महासङ्घ प्रतिष्ठान शाखाको आज बसेको बैठकले उनीहरुलाई पुस्कार प्रदान गर्ने निर्णय गरेको प्रष्ठिानका अध्यक्ष कृष्णप्रसाद सापकोटाले जानकारी दिए ।

सो पुरस्कारको राशि जनही रु १० हजार रहेको छ । दुई दशकभन्दा बढी समयदेखि पत्रकारितामा क्रियाशील गिरी नेपाल पत्रकार महासङ्घ दार्चुला शाखाका संस्थापक अध्यक्ष पनि हुन् । भट्टराई विगत दुई दशकदेखि पत्रकारितामा आबद्ध छन् ।

यसैगरी, ‘उमाकान्त–गीतादेवी–स्मृति पुरस्कार’ राससको दाङस्थित जिल्ला समाचारदाता सुशीला ओलीलाई प्रदान गर्ने निर्णय गरिएको छ ।

पुरस्कारको राशि रु पाँच हजार रहेको छ । लुम्बिनी प्रदेश कार्यालय दाङका उपसमाचारदाता नारायणी रजौरेले आफ्ना, माता, पिता र भाइको सम्झनामा २०६६ फागुन ७ गते पुरस्कार स्थापना गरेको हो ।

त्यसैगरी प्रतिष्ठान शाखाले तीन दशकभन्दा धेरै समय राससको सेवामा संलग्न पूर्वमहाप्रबन्धक रामकुमार कोइरालालाई पूर्वकर्मचारीका तर्फबाट प्रदान गरिने ‘रासस सम्मान–२०८१’ प्रदान गर्ने निर्णय गरिएको छ ।

कोइरालालाई कदरपत्र र दोसल्लासहित सम्मान गरिनेछ । राससको ६४औँ वार्षिकोत्सवका अवसरमा यही फागुन ७ गते ती पुरस्कार प्रदान गरिनेछ ।