काठमाडौं । प्रेस सेन्टर नेपालले गणतन्त्र, संघीयता, धर्मनिरपेक्षता, समानुपातिक समावेशीता र संविधानमाथि भइरहेको प्रहारलाई रोक्न माग गरेको छ ।

आइतबार सरकारलाई १५ बुँदे ज्ञापनपत्र बुझाउँदै प्रेस सेन्टरले नेपाली जनताको राजनीतिक उपलब्धीमाथिको प्रहारलाई रोक्न माग गरेको हो । नेपाली जनताको लामो संघर्षपछि प्राप्त उपलब्धिहरुको रक्षा हुनुपर्ने ज्ञापन पत्रमा माग गरिएकाे छ ।

सरकारले पत्रकारिता पुरस्कार छनौट गर्दा दलीय मागबण्डा गरेको बताउँदै प्रेस सेन्टरले त्यसको विरोध गरेको छ । ज्ञापन पत्रमा आगामी दिनमा पुरस्कार छनौट गर्दा दलीय भागबण्डाबाट मुक्त भई नेपालको संविधानले सुनिश्चित गरेको समानुपातिक, समावेशीतालाई आत्मसात् गरेर सक्रिय तथा श्रमजीवी पत्रकारलाई पुरस्कार दिन आग्रह गरेको छ ।

सेन्टरले गोरखापत्र संस्थानलगायत सरकारी सञ्चार संस्था र सरकारी निकायमा जिम्मेवार पदाधिकारीलाई आस्थाकै आधारमा हटाउन कोसिस गर्ने, बारम्बार स्पष्टिकरण सोधेर हतोत्साहित गर्ने, कार्यक्षेत्रमा काम गर्ने वातावरण बन्न नदिने कार्य गरिएको भन्दै विरोध गरेको छ । यस्ता कार्य तत्काल रोक्न प्रेस सेन्टरले माग गरेकाे छ ।