काठमाडौँ । नेपालका चार खेलाडीले स्पेनमा हुने तेस्रो संस्करणको विश्व माउन्टेन र ट्रेल रन च्याम्पियनसिप खेल्ने भएका छन् ।

विश्व एथलेटिक्सले आयोजना गर्ने प्रतियोगितामा नेपालका सुमन कुलुङ, साङ्गे शेर्पा, मनकुमार रोका र सुनमाया बुढाले भाग लिने छन् । स्पेनको क्यान फ्रान्कमा हुने प्रतियोगिता सेप्टेम्बर २४ देखि २९ सम्म हुनेछ ।

भिसाका कारण पुरा टिम सहभागी हुन नपाए पनि नेपालबाट सबैभन्दा माथिल्लो वरीयताका ट्रेल रनरले विश्व स्तरीय प्रतियोगितामा देशको प्रतिनिधित्व गर्न लागेको नेपाल एडभेन्चर रनिङ फेडेरेसनले जनाएको छ ।

नेपाल नम्बर एक सुमन कुलुङ एसिया वरीयताका समेत एक नम्बरका खेलाडी हुन् भने महिलातर्फ नेपाल नम्बर एक खेलाडी सुनमाया बुढा एसिया वरीयताकी तेस्रो नम्बरकी खेलाडी हुन् । चारै खेलाडीले सिंगल लामो दुरीको ट्रेल रनको इभेन्टमा प्रतिस्पर्धा गर्नेछन् ।

टिम म्यानेजर प्रीति खत्रीले अन्तराष्ट्रिय मापदण्डअनुसार खेलाडी छनोट गरिएको बताइन् । ‘मुख्य मापदण्डको रूपमा आईटीआरए र्‍याङकिङलाई प्राथमिकता दिइएको छ । पुरुष खेलाडीका लागि योग्यता हासिल गर्न ८६० भन्दा बढी आईटीआरए स्कोर आवश्यक थियो । जसमा शीर्ष तीन पुरुष र महिला खेलाडी छनोट भएका हुन् ।’

महासंघका अध्यक्ष एकेन्द्र कुँवरले नेपाली खेलाडीले विश्व स्तरीय प्रतियोगितामा प्रतिस्पर्धा गर्नु सबै नेपालीका लागि गर्वको विषय रहेको बताए । उनले फेडेरेसनले नेपाली खेलाडीको विश्वस्तरीय प्रदर्शनलाई सहयोग गर्न आवश्यक पूर्वाधार निर्माण गर्दै अन्तराष्ट्रिय पहुँच सुधार गर्न निरन्तर काम गरिरहेको जनाएका छन् ।