काठमाडाैं । काठमाडौं—अछाममा पहिलो पटक जीबी मेमोरियल स्कुल प्रिमियर लिग क्रिकेट सुरु भएको छ । मंगलबारबाट अछामको बान्नीगढी—५ कालिकास्थित थालाकोट मैदानमा प्रथम जीबी मेमोरियल स्कुल प्रिमियर प्रिमियर लिग क्रिकेट सुरु भएको हो ।

जीबी मेमोरियल स्कुल प्रिमियर लिग क्रिकेटको उद्घाटन बान्नीगढी जयगढ गाउँपालिकाका अध्यक्ष टेकबहादुर साउँदले गरे । उद्घाटन समारोहका प्रमुख अतिथीसमेत रहेका अध्यक्ष साउँदले स्वर्गीय गोकर्ण रावलले छोडेर गएका अधुरा काम पूरा गर्न सबै एकजुट भएर अघि बढ्नुपर्ने बताए । ‘आगामी दिनमा पनि यस्ता प्रतियोगिताहरुका लागि गाउँपालिकाका सहयोग उपलब्ध गराउनेछ,’ उनले भने ।

जीबी मेमोरियल फाउण्डेसनका अध्यक्ष सुरज रावलको अध्यक्षतामा सम्पन्न भएको कार्यक्रममा विशिष्ट अतिथी तथा मंगलसेन नगरपालिकाकी उपप्रमुख संगीता रावल सोडारीले विद्यार्थीका लागि प्रतियोगिता कोसेढुंगा भएको बताइन् ।

कार्यक्रममा बान्निगढी जयगढ गाउपालिका—५ का अध्यक्ष टंक साउँद, समाजसेवी दानबहादुर रावललगायत स्थानीय समाजसेवी, शिक्षक, बुद्धिजीवीलगायतको उपस्थिती रहेको थियो ।

जीबी मेमोरियल प्रिमियर लिग क्रिकेटमा जिल्लाभरबाट १२ वटा टिमको सहभागिता रहेको छ । सो अवसरमा खेलाडीलाई पोशाक तथा खेल सामाग्री हस्तान्तरण गरिएको थियो ।

जीबी मेमोरियल प्रिमियर लिग क्रिकेट एक हप्ता चल्नेछ । जीबी मेमोरियल स्कुल प्रिमियर लिग क्रिकेटका विजेताले एक लाख रुपैयाँ, उपविजेताले ५० हजार रुपैयाँ र तेस्रो हुने टिमले १० हजार रुपैयाँ पुरस्कार पाउनेछन् ।

प्रतियोगिताको टाइटल स्पोन्सर मन्त्र एजुकेशन एण्ड माइग्रेसन रहेको छ भने इलाइट विजनेश, क्याम युथ एशोसिएसन र एसटीएल इन्टरनेशनलले सहयोग गरेका छन् । लिगलाई अष्ट्रेलियामा रहेका नेपाली व्यवसायीहरुको पनि सहयोग रहेको छ ।

ग्रेट हिमालय क्रिकेट एकेडेमीले लिगको म्यान अफ सिरिज, वेष्ट बलर र बेष्ट ब्याटसम्यानलाई ६÷६ महिना पहिलो श्रेणीको तालिम उपलब्ध गराउनेछ । प्रतियोगितामा झण्डै १२ लाख खर्च हुने अनुमान गरिएको छ ।

यसअघि प्रतियोगिता १ पुसबाट सुरु गर्ने भएतापनि चिसो बढ्ने र व्यवस्थापन असहज हुने भएकाले २३ मंसिरबाट सुरु गर्नुपरेको जीबी मेमोरियल फाउण्डेसनका अध्यक्ष रावलले जानकारी दिए ।