काठमाडौँ । प्रधानमन्त्री शेरबहादुर देउवाले भरतपुर महानगरपालिकामा रेणु दाहाललाई जिताउन कांग्रेसका नेता कार्यकर्तालाई निर्देशन दिएका छन् । भरतपुरमा आयोजित आमसभामा बोल्दै उनले गठबन्धनको मेयरकी उम्मेदवार रेणुलाई भोट दिन निर्देशन दिएका हुन् ।

‘गठबन्धनलाई दुई तिहाई भोटले जिताउनु, मेचीदेखि महाकालीसम्मका कांग्रेसका साथीहरूले गठबन्धनलाई विश्वास लिएर गठबन्धनमा भोट दिनु,’ कांग्रेसका सभापतिसमेत रहेका देउवाले भने, ‘रेणु दाहाललाई कुनै पनि हालतमा भोट हाल्नु पर्छ ।’

प्रधानमन्त्री देउवाले कुनै एउटा पार्टीले देश बनाउन नसक्ने भन्दै देश बनाउन गठबन्धन आवश्यक रहेको बताए । उनले भने, ‘कुनै एउटा पार्टीले देश बनाउन सक्दैन, गठबन्धन आवश्यक छ, कसैले बहुमत ल्याउन सक्दैन ।’

उनले भरतपुरमा रेणुले गरेको कामको प्रशंसा गरेका थिए ।

कांग्रेसका चितवनका पूर्वा जिल्ला सभापति लगायतको साथमा कांग्रेसकै पूर्वा सांसद जगन्नाथ पौडेलले बागीमा उम्मेदवारी दिएका थिए । कांग्रेसले उनको सदस्यता खोसिसकेको छ । बागी उम्मेदवारी दिएका र गठबन्धन गरेकोमा विरोध गरिरहेका कांग्रेसका नेताहरुलाई पनि प्रधानमन्त्री देउवाले चितवनको चुनावी सभाबाटै जवाफ दिएका हुन् ।

गठबन्धनप्रति कांग्रेसका ८२ प्रतिशत ले साथ दिएको र अनुमोदन गरेको प्रधानमन्त्री देउवाको भनाई थियो ।

‘यो गठबन्धनप्रति जनताको विश्वास भएकै कारणले होला ८२ प्रतिशत साथीहरूले मलाई पार्टीको सभापति बनाएका होलान् नि । कांग्रेसको साथीहरू गठबन्धनको विरोधमा भएको भए मलाई हराइहाल्थे नि’ प्रधानमन्त्री देउवाले भने ।

त्यसपछि पनि उनले फेरि दोहोरयाएर चितवनको भरतपुरमा गठबन्धनका साझा उम्मेदवार माओवादी केन्द्रकी नेतृ रेणु दाहाललाई मेयरमा हसियाँ अथौडामा भोट हाल्न निर्देशन गरेका थिए ।