काठमाडौँ । गत वैशाख ३० गते सम्पन्न स्थानीय तह निर्वाचनको अन्तिम मत परिणाम आउने क्रममा छ । यसैबीच यस चुनावमा दुई जना वृद्धाले जित हात पार्दै विजयी भएका छन् ।

९४ वर्षको उमेरमा विजयी हुनेहरूमा महोत्तरीका ९४ वर्षीय जीबछ नदाफ र मोरङका सूर्यनारायण मण्डल रहेका छन् । उनीहरू दुवै जना वडा सदस्यमा विजयी भएका हुन् ।

महोत्तरीको बलवा नगरपालिका वडा नम्बर १ मा उम्मेदवारी दिएका ९४ वर्षीय नदाफ विजयी हुँदा नेकपा एमालेका बजरंगी महतो पराजित भए । उनले ५७४ मत ल्याए । उनका प्रतिद्वन्द्वी महतोले ३६३ मत पाए ।

यस्तै, मोरङको जहदा गाउँपालिका वडा नम्बर ७ को वडा सदस्यमा ९४ वर्षीय मण्डल विजयी भए । उनले ९३० मत ल्याउँदै नेकपा माओवादी केन्द्रका लिलानन्‍द ठाकुरलाई पराजित गरे । ठाकुरले ४८६ मत मात्र पाए । उनीहरू दुवै नेपाली कांग्रेसका उम्मेदवार हुन् ।