काठमाडौँ । नेपाली कांग्रेसका उपसभापति पूर्णबहादुर खड्काले स्थानीय तहको निर्वाचनको नतिजाले दललाई सचेत गराएको बताएका छन् । उनले काठमाडौँसहित केही स्थानको मत परिणामले दललाई केही संकेत गरेको बताए ।

‘स्थानीय तह निर्वाचनको परिणामले दललाई जनताले टाढा राख्न खोजेको नभइ केही ठाउँको निर्वाचनको परिणामले भने राजनीतिक दल र दलको जिम्मेवारीलाई सचेत गराएको छ,’ उनले भने ।

स्थानीय तहको निर्वाचन शान्तिपूर्ण सम्पन्न भएको भन्दै उनले दलले अहिलेको निर्वाचनले गरेको संकेतलाई ध्यान दिन जरुरी रहेको बताए ।

राजधानीलगायत केही ठाउँको निर्वाचन परिणामलाई लिएर दलका नेतृत्वले समीक्षा गरेर आउने दिनमा नयाँ निर्णय गर्दै फरक तरिकाले पार्टी चलाउनु पर्ने देखिएको उनको भनाइ थियो ।

यस्तै, उपसभापति खड्काले संसदमा प्रस्तुत नीति तथा कार्यक्रम मुलुकको आवश्यकतालाई धेरै हदसम्म सम्बोधन गर्ने गरी ल्याइएको बताए ।