काठमाडौँ । जिल्ला समन्वय समिति जुम्लाको प्रमुखमा कांग्रेसका गौरीनन्द आचार्य र उपप्रमुखमा नेकपा एकीकृत समाजवादीका जनक थकाली निर्विरोध भएका छन् ।

कांग्रेस र समाजवादीबीच गठबन्धन भएपछि दुवै जना निर्विरोध भएका हुन् । कांग्रेसबाट जिल्ला समन्वय समितिको सदस्यमा गंगादेवी रोकाया, धनसुर बुढा, खिमालक्ष्मी काफ्ले, रचा रावत, लग्नमाया भण्डारी बुढा र नरवीर सुनार निर्विरोध भएका प्रमुख निर्वाचन अधिकृतको कार्यालयका सहायक अधिकृत तोयानाथ उपाध्यायले जानकारी दिए ।

यस्तै, समाजवादीबाट जिसस सदस्यमा पदमबहादुर रावत निर्विरोध भएका छन् । एक नगरपालिका र सात गाउँपालिकामा कांग्रेसको आठ, माओवादीको ६ तथा समाजवादी र स्वतन्त्रको एक–एक मतभार रहेको थियो ।