काठमाडौँ । आगामी मंसिर ४ गते हुने संघ र प्रदेशसभा निर्वाचनका लागि नेपाल प्रहरीले १५० वटा सवारी साधन खरिद गर्न ७५ करोड रुपैयाँ बजेट पाएको छ । सात सयभन्दा बढी सवारी साधनको आवश्यक परेको भन्दै तीन अर्ब बजेट माग गरेकोमा ७५ करोड रुपैयाँ मात्रै प्राप्त गरेको हो ।

गृह मन्त्रालयका प्रवक्ता फणिन्द्रमणि पोखरेलले नेपाल प्रहरीले सवारी साधन खरिद गर्न ७५ करोड रुपैयाँ प्राप्त गरेको यकिन गरे । उनले मेरोन्यूजसँग भने, ‘सवारी साधन खरिदका लागि ७५ करोड विनियोजन भएको भन्ने छ, थप विवरण आउन बाँकी छ ।’

‘सवारी साधन खरिदका लागि नेपाल प्रहरीलाई रकम विनियोजन गरेको कुरा हिजो नै निर्णय भएको हो, यद्यपि विस्तृत विवरण भने आइसकेको छैन,’ गृह मन्त्रालयका सूचना अधिकारी तथा सहप्रवक्ता वसन्त भट्टराईले भने ।

०७० सालमा किनेका सवारी साधन बिग्रेकाले त्यसलाई विस्थापन गर्नका लागि पनि नयाँ सवारी साधनको आवश्यकता परेको प्रहरीले बताउँदै आएको छ ।

देशमा आर्थिक अवस्था कमजोर भएको भन्दै वैशाखमा भएको स्थानीय तह निर्वाचनमा सरकारले प्रहरीलाई सवारी साधनका लागि बजेट उपलब्ध गराएको थिएन । स्थानीय तह निर्वाचनमा नेपाल प्रहरीले एक हजार दुई सय सवारी साधन भाडामा लिएर चलाएको थियो ।

आगामी चुनावका लागि प्रहरीले एक हजार ५२९ पीकअप भ्यान, ११० वटा ‘वान टन’ गाडी र बस किन्नका लागि बजेट माग गरेको थियो । तर, प्रहरीले माग गरेबमोजिम बजेत पाउन नसकेको हो ।