काठमाडौँ । अष्ट्रेलियाका चर्चित पूर्व बलर ब्रेट लीलाई नेपाल टी-२० लिगको मेन्टरमा नियुक्त भएका छन् । उनलाई नेपाल क्रिकेट संघ (क्यान)ले आयोजना गर्न लागेको नेपाल टी-२० लिगको मेन्टरको नियुक्त गरिएको हो ।

क्यानले शुक्रबार आयोजित पत्रकार भेटघाट कार्यक्रम मेन्टरको रुपमा नियुक्त भएका ब्रेट लीले नेपालको क्रिकेट क्रेज आफूलाई मन परेको बताए । फ्रेञ्चाइज क्रिकेट प्रतियोगिता नेपाल टी-२० लिगका ब्राण्ड एम्बेस्डरको रुपमा ब्रेट ली नेपाल आएका हुन् ।

पहिलो संस्करणको नेपाल टी-२० लिग असोज ८ देखि कात्तिक ५ गतेसम्म आयोजना हुँदै छ । प्रतियोगितामा ६ टोलीले प्रतिस्पर्धा गर्ने छन् । प्रतियोगिताका लागि ६ टोलीको पनि टुङ्गो लागेको छ ।

पहिलो संस्करणमा कान्तिपुर क्यापिटल, लुम्बिनी अल स्टार्स, विराटनगर सुपर किङ्स, जनकपुर रोयल्स, पोखरा एभेन्जर्स र फारवेस्ट युनाइटेडले प्रतिस्पर्धा गर्दै छन् ।