काठमाडौँ । पेट्रोलियम पदार्थ ढुवानी व्यवसायीले आन्दोलन फिर्ता लिने भएको छ । दशैँको मुखमा व्यवसायीले विभिन्न माग राख्दै आन्दोलन थालेकोमा उद्योग, वाणिज्य तथा आपूर्ति मन्त्रालयमा भएको वार्तापछि व्यवसायी आन्दोलन फिर्ता लिन सहमत भएको हो ।

सहमतिअनुसार आन्दोलनका कार्यक्रम स्थगित गरी ढुवानी सेवा सुरु हुने भएको छ । सहमति पत्रमा आपूर्ति तथा वितरण विभागका निर्देशक वीरेन्द्र गोइत र नेपाल पेट्रोलियम ढुवानी व्यवसायी महासंघका अध्यक्ष खगेश्वर बोहराको हस्ताक्षर गरेका छन् ।

सहमतिअनुसार नेपाल पेट्रोलियम ढुवानी व्यवसायी महासंघले ढुवानी भाडा वृद्धि तथा समायोजन गर्न माग गरेकामा यसबारे असोज ७ गते सम्ममा निर्णय गरी लागू गर्ने सहमति भएको छ ।

यस्तै, नेपाल पेट्रोलियम ट्यांकर चालक संघ र नेपाल यातायात स्वतन्त्र मजदुर संगठनले राखेका मागका सम्बन्धमा महासंघको प्रतिनिधिसहित सम्बन्धित संघ तथा संगठनको प्रतिनिधिको उपस्थितिमा आवश्यक छलफल गर्ने निर्णय भएको छ ।