काठमाडौँ । शेरबहादुर देउवा नेतृत्वको सरकारले प्रदान गर्ने निर्णय गरेका ६ जनाको विभूषण रद्द गर्ने निर्णय वर्तमान पुष्पकमल दाहाल ‘प्रचण्ड’ सरकारले गरेको छ ।

गृह मन्त्रालय अन्तर्गतको विभूषण शाखाको सिफारिसमा उनीहरूको विभूषण रद्द गर्ने निर्णय मन्त्रिपरिषद्ले गरेको हो ।

गृह मन्त्रालयको विभूषण हेर्ने आन्तरिक व्यवस्थापन महाशाखाका अनुसार सुरक्षाकर्मी हत्या अभियोगमा फरार सांसद लक्ष्मी महतो कोइरी र भ्रष्टाचार मु्द्दा चलिरहेका उद्योगी पशुपति मुरारका, व्यापारी चिराग गोयल, शिक्षकहरू डा.हरिप्रसाद कँडेल, यामबहादुर श्रेष्ठ र कर्मचारी शेरबहादुर श्रेष्ठ, नविन पौडेल नेपाल प्रहरीका प्रकाश कठायत, नेपाली सेनाकी आसिना कार्की को विभूषण रद्द गर्ने निर्णय मन्त्रिपरिषद् बैठकले गरेको हो ।

उद्योगी मुरारकामाथि खानी दोहनको अभियोगमा अख्तियार दुरुपयोग अनुसन्धान आयोगले विशेष अदालतमा २०७८ माघ १२ गते ४९ करोड ४५ लाख ५१ हजार ६ सय ४५ रुपैयाँ बिगो र २ वर्ष कैद मागदाबीसहित मुद्दा दायर गरेको छ ।

नेपाल उद्योग वाणिज्य महासंघका पूर्वअध्यक्षसमेत रहेका मुरारकाविरुद्ध अख्तियारले दायर गरेको मुद्दा किनारा नलाग्दै मन्त्रिपरिषद्को सिफारिसमा राष्ट्रपति विद्यादेवी भण्डारीबाट मुरारकालाई ‘सुकीर्तिमय राष्ट्रदीप’ विभूषण घोषणा गरिएपछि आलोचना भएको थियो । मुरारका खानी उद्योग सिद्धार्थ मिनिरल्सका सञ्चालक हुन् ।

सांसद कोइरीले २०७२ भदौ २५ मा सशस्त्र प्रहरी बलका सहायक निरीक्षक (असई) थमन विक हत्या अभियोगका उच्च अदालत जनकपुरले पुर्पक्षमा थुनामा राखेर अनुसन्धान गर्न निर्देशन दिएको छ । कोइरीलाई मन्त्रिपरिषद्को सिफारिसमा राष्ट्रपति विद्यादेवी भण्डारीबाट ‘समाजसेवी’ का रूपमा ‘प्रबल जनसेवाश्री’ दिने घोषणा गर्दावित्तिकै सरोकारवालाहरूले आपत्ति जनाएका थिए । सात वर्षअघि मधेसमा चर्केको सरकारविरोधी प्रदर्शनमा असई विक आन्दोलनकारीबाट मारिएका थिए । महतोलाई योजनाकारका रूपमा प्रहरीले किटान गरेको छ । घटनापछि फरार उनी वारेसबाट मनोनयन दर्ता गराएर मंसिर ४ मा सम्पन्न प्रतिनिधिसभा निर्वाचनमा महोत्तरी–१ बाट विजयी भएका छन् ।

संविधान दिवसको दिन पारेर सरकारले गत असोज ३ गते ९ सय ९८ जनालाई विभिन्न किसिमका विभूषण घोषणा गरेको थियो ।

विभूषण रद्द भएका व्यापारी गोयललाई प्रवल जनसेवाश्री दिने घोषणा गरिएको थियो । उनले अघिल्लो वर्ष जनसेवाश्री पदक पाइसकेकोले उनी यसवर्ष अर्को पदक पाउने योग्यताभित्र नपरेका कारण रद्द गरिएको हो । एउटा पदक पाएको दुइवर्ष पुरा नुहँदै अर्को पदक दिन नमिल्ने कानुनी व्यवस्था छ ।

विभूषण रद्द भएका भिमोदय नमूना माबी चितवनका शिक्षक डा.हरिप्रसाद कँडेल भ्रष्टाचार आरोपमा अख्तियार अनुसन्धानको दायरामा छन् । उनलाई प्रवल जनसेवाश्री दिने घोषणा गरिएको थियो । त्यस्तै जननमुना माबी सुर्खेतको शिक्षक यामबहादुर श्रेष्ठ पनि भ्रष्टाचार आरोपमा अनुसन्धानको दायरामा छन् । उनलाई पनि प्रवल जनसेवाश्री दिने घोषणा गरिएको थियो ।

प्रवल जनसेवाश्री पाउने सूचीमा रहेका कर्मचारी शेरबहादुर श्रेष्ठको पनि रद्द गरिएको छ । भू तथा जलाधार व्यवस्थापन कार्यलय सुर्खेतमा कार्यरत रहेका बेला भ्रष्टाचार गरेको भन्दै उनीमाथि अख्तियारले विशेष अदालतमा मुद्दा दायर गरेको छ ।

नेपाल प्रहरीका कठायत र नेपाली सेनाकी कार्कीको पनि पहिले विभूषण लिएको र पुनः विभूषण लिने समय नपुगेका कारण रद्द गरिएको गृह मन्त्रालयको विभूषण शाखाले जानकारी दिएको छ ।