मड्रिड । बार्सिलोना विपक्षी टोलीको आत्मघाती गोलको मद्दतले हारबाट जोगिएको छ । शनिबार भएको खेलमा बार्सिलोनाले रायो भायोकानोसँग १–१ को बराबरी खेलेको हो ।

खेलको ३९ औँ मिनेटमा उनाई लोपेजले रायोलाई अग्रता दिलाएका थिए । यसअघि फ्रांकी डी योङको गल्तीमा रायोले गोलको अवसर पाएको थियो, तर त्यसलाई गोलकिपर इनकाई पेनाले बचाउ गरेका थिए ।

दोस्रो हाफमा बार्सिलोनाले गोलका केही अवसर सिर्जना गरे पनि त्यसलाई परिणत भने गर्न सकेन । हारतर्फ अघि बढिरहँदा रायोका फलोरियान लेजेउनले आत्मघाती गोल गरेपछि बार्साले केही राहत पाएको थियो ।

बराबरपछि बार्सा र म्यानेजर ज्याभीमाथि दबाब बढेको छ । टोलीले पछिल्ला चारमध्ये तीन खेलमा अंक गुमाएको छ । १४ खेलपछि ३० अङ्कसहित बार्सा लिगको तेस्रो स्थानमा छ । २१ अङ्कसहित रायो आठौँ स्थानमा रहेको छ ।