काठमाडौँ । प्रधानमन्त्री कप पुरुष राष्ट्रिय क्रिकेट प्रतियोगिताअन्तर्गतको खेलमा नेपाल एपीएफ क्लबले चौथो जित हात निकालेको छ ।

मुलपानी क्रिकेट मैदानमा शनिबार भएको खेलमा गण्डकी प्रदेशलाई ८८ रनले पराजित गर्दै एपीएफले सात खेलमा चौथो जित हासिल गरेको हो ।

एपीएफले दिएको २ सय ८ रनको लक्ष्य पछ्याएको गण्डकीले ३३ ओभर ४ बलमा सबै विकेट गुमाएर १ सय १९ रनमात्र बनाउन सक्यो ।

गण्डकीका लागि समिर कँडेलले ३३ तथा इश्वर क्षेत्रीले २८ रन बनाए ।

एपीएफका अमर रौटेलाले सर्वाधिक ४, मौसम ढकालले ३, भुवन कार्कीले २ र रमेश कुर्मीले १ विकेट लिए ।

यसअघि टस हारेर पहिले ब्याटिङ गरेको एपीएफले ४७ ओभर २ बलमा सबै विकेट गुमाउँदै २ सय ७ रन जोड्यो ।