• 

काठमाडौं । शिवपुरी–नागार्जुन राष्ट्रिय निकुञ्जको जंगलमा लागेको डढेलो नियन्त्रण बाहिर गएपछि हेलिकोप्टरबाट पानी खसालिएको छ । बूढानीलकण्ठ नगरपालिका–२ तैलुङको जंगलमा लागेको डढेलो निभाउन सिम्रिक एयरको हेलिकोप्टरबाट पानी खसालिएको हो ।

आइतबार बिहानदेखि उक्त क्षेत्रमा डढेलो सल्किरहेको छ । दुई/तीन वटा हेलिकोप्टरबाट पानी ओसारेर जंगलमा खसालिएको छ । आगो निभाउन हेलिकप्टरमा एक हजार लिटर जाने ट्याङ्की (व्याम्बी बकेट) को प्रयोग गरिएको छ । उक्त डढेलो नियन्त्रण गर्न नेपाली सेनाको महेन्द्रदल गणबाट तीन वटा दमकलसहित ७६ जनाको अग्नि नियन्त्रक टोली खटिइएको थियो ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेलका अनुसार आगो नियन्त्रणका लागि सिम्रिक एयरको हेलिकप्टर प्रयोग गरिएको हो । यसअघि पाथीभरामा लागेको आगो नियन्त्रणका लागि पनि हेलिकप्टर प्रयोग गरिएको थियो ।

यसअघि स्थानीय समुदाय र सुरक्षा निकायको सहभागितामा गरिएको प्रयास जारी रहँदै गर्दा फैलिने क्रम नरोकिएपछि हेलिकप्टर प्रयोग गरिएको जनाइएको छ । स्थलमार्गबाट पनि दमकलसहित स्थानीय सङ्घ संस्था, समुदायका प्रतिनिधि तथा सुरक्षाकर्मीले आगो निभाउने प्रयास जारी राखेका छन् ।

नेपाली सेना, नेपाल प्रहरी, सशस्त्र प्रहरी बल, वन तथा वातावरण, खानेपानी, गृह मन्त्रालय, राष्ट्रिय विपद् जोखिम न्यूनीकरण तथा व्यवस्थापन प्राधिकरण, मेलम्ची खानेपानी आयोजनालगायतको समन्वयमा आगलागी नियन्त्रणको काम भइरहेको छ । हेलिकप्टरले सुन्दरीजलस्थित मेलम्ची खानेपानी आयोजनाको पानी प्रशोधन पोखरीको पानी प्रयोग गरेको छ ।

पानी खसालेपछि आगलागी नियन्त्रणतर्फउन्मुख रहेको पोखरेलले जानकारी दिए । शिवपुरी नागार्जुन राष्ट्रिय निकुञ्ज काठमाडौँ उपत्यकाको मुख्य पानीको स्रोत भएको त्यहाँका प्रमुख लक्ष्मण पौडेलले जानकारी दिए ।