काठमाडौं । गाजा युद्धविराम सम्झौताअन्तर्गत शनिबार चार इजरायली बन्धकलाई रिहा गरिने भएको छ । तीमध्ये केही सैनिक र केही सर्वसाधारण हुनसक्ने अनुमान गरिएको छ । ती सबै महिला बन्धक हुन सक्ने जनाइएको छ ।

हमासले छिट्टै नाम सार्वजनिक गर्नेछ । ती बन्धकहरूलाई इजरायली जेलमा बन्दी बनाएका १८० प्यालेस्टिनी कैदीहरूको सट्टामा रिहा गरिनेछ ।

गत आइतबार लागु भएको युद्धविरामको यो दोस्रो आदानप्रदान हुनेछ । पहिलोपटक तीन इजरायली बन्धकहरूको सट्टामा ९० प्यालेस्टिनी कैदीलाई रिहा गरिएको थियो ।

यो युद्धविराम सम्झौताले अक्टोबर ७, २०२३ मा हमासले इजरायलमा गरेको आक्रमणपछि सुरु भएको युद्धलाई रोकेको थियो ।