काठमाडौं । प्रतिनिधिसभाको बैठक १५ मिनेटका लागि स्थगित भएको छ । गणपुरक संख्या नपुगेपछि प्रतिनिधिसभा बैठक १५ मिनेटका लागि स्थागित भएको हो ।

‘भूमिसम्बन्धी केही नेपाल ऐनलाई संशोधन गर्न बनेको विधेयकमाथि विचार गरियोस्’ भन्ने प्रस्तावलाई निर्णयार्थ प्रस्तुत गर्न गणपुरक संख्या अपुग भएको हो । सभामुख देवराज घिमिरेले प्रस्ताव निर्णयार्थ पेस गर्दा माओवादी केन्द्रका प्रमुख सचेतक हितराज पाण्डेले गणपुरक संख्या एकीन गर्न माग गरेका थिए ।

संविधानको धारा ९४ अनुसार कुनै पनि प्रश्न वा प्रस्ताव पेस गर्न एकचौथाइ सांसद बैठकमा उपस्थित हुनुपर्ने व्यवस्था छ । सोहीअनुसार तीन मिनेट घण्टी बजाएर गणपुरक संख्या एकीन गरिएको थियो । 

प्रस्ताव पेस गर्दा गणपुरक संख्या ६९ हुनुपर्नेमा ६५ सांसद मात्रै बैठकमा उपस्थित भएकाले सभामुख घिमिरेले बैठक स्थगित गरेका हुन् ।