काठमाडाैं । सूर्य नेपाल गल्फ टुर २०२५–२६ अन्तर्गतको दोस्रो प्रतियोगिता सूर्य नेपाल इस्टर्न ओपन बुधबारदेखि धरान गल्फ क्लबमा सुरु हुँदै छ । कोशी प्रदेशको सानको रूपमा परिचित धरान गल्फ क्लबमा आयोजना हुने यो प्रतियोगिता सूर्य नेपाल प्रालिको प्रायोजनामा तीन दिनसम्म ५४ होलमा खेलाइनेछ ।

प्रतियोगिताको कुल पुरस्कार राशि १० लाख ५० हजार रुपैयाँ रहेको छ । रुखले घेरिएका फेयर वे र सट सेपिङ क्षमताको कडा परीक्षा लिने धरान गल्फ क्लब अर्को एक रोमाञ्चक प्रतियोगिताको साक्षी बन्ने तयारीमा रहेको छ । प्रतियोगिताको उपाधि विजेताले एक लाख ७० हजार रुपैयाँ प्राप्त गर्नेछन् । उपविजेताले एक लाख २५ हजार र तेस्रो स्थान हासिल गर्ने खेलाडीले एक लाख रुपैयाँ पुरस्कार पाउनेछन् । शीर्ष १८ स्थानमा रहने खेलाडीहरूले नगद पुरस्कार बाँडफाँट गर्नेछन् ।

प्रतियोगितामा २९ जना व्यावसायिक खेलाडी र ह्यान्डिक्याप पाँच वा सोभन्दा कम भएका २२ जना एमेच्योर खेलाडी सहभागी हुने आयोजकले जनाएको छ । अर्डर अफ मेरिटका नम्बर १ केवाड़ी तथा साबिक विजेता नीरज तामाङ मुख्य दाबेदारका रूपमा रहेका छन् । घरेलु मैदानको फाइदा पाउने नीरजलाई शुक्रबहादुर राई, भुवन नगरकोटी, दिनेश प्रजापति, जयराम श्रेष्ठ, सञ्जय लामा र धन थापाजस्ता अनुभवी खेलाडीहरूले कडा चुनौती दिने अपेक्षा छ ।

सिजनको पहिलो प्रतियोगिताको विजेता एमेच्योर खेलाडी राहुल विश्वकर्माले जितेका थिए । उनले पुन: एकपटक प्रोफेसनल खेलाडीलाई कडा चुनौती दिने अनुमान गरिएको छ । ३६ होलको खेलपछि कट लागू हुनेछ । जसअनुसार शीर्ष १८ व्यावसायिक खेलाडी र सोही कटमा एमेच्योरहरू अन्तिम चरणमा प्रवेश गर्नेछन् । प्रतियोगिताको समापन माघ १७ गते शनिबार प्रो–एम प्रतियोगितासँगै हुनेछ ।