काठमाडौं ।  आईसीसी टी–२० विश्वकप २०२६ अन्तर्गत आइतबार भारत र पाकिस्तानको खेल हुँदैछ । समूह ‘ए’मा भारत र पाकिस्तानले दुई दुई खेल जितिसकेका छन् । समान चारचार अंक भए पनि रनरेटका आधारमा भारत शीर्ष स्थानमा छ भने पाकिस्तान दोस्रो स्थानमा छ ।

भारत र पाकिस्तानको खेल आइतबार साँझ ७ः१५ बजे श्रीलंकाको कोलम्बोमा सुरु हुँदैछ । भारतसँग विश्वकप नखेल्ने निर्णय गरेको पाकिस्तानले पछिल्लो समय निर्णय फिर्ता लिएको हो । सामरिक दृष्टिकोणले समेत भारत र पाकिस्तानको खेललाई रोचक ढंगले हेरिन्छ ।भारत र पाकिस्तान दुवै टिम अपराजित रहँदै सुपर एटमा पुग्न चाहन्छन् । आजको खेलमा टिम सुपर एटमा पुग्नेछ । विश्वकपमा समूह ‘ए’मा भारत, पाकिस्तान, अमेरिका, नेदरल्यान्ड्स र नामिबिया छन् । यो समूहमा अमेरिका र नेदरल्यान्ड्सले एकएक जित निकाल्दा नामिबिया जितबिहीन छ ।

आइतबार अर्को खेलमा आइतबार बिहान नेपालले वेस्ट इन्डिजसँग प्रतिस्पर्धा गर्दैछन् । नेपाल र वेस्ट इन्डिजको खेल नेपाली समय अनुसार आइतबार बिहान ११ः१५ बजे भारतको मुम्बईस्थित वनखेडे मैदानमा हुँदैछ ।समूह ‘सी’मा रहेको नेपाल अंकबिहीन छ । शीर्ष स्थानमा रहेको वेस्ट इन्डिजले चार अंक जोडिसकेको छ । नेपाल आज पहिलो जितको खोजीमा हुनेछ भने वेस्ट इन्डिज तेस्रो जित निकाल्दै सुपर आठमा पुग्ने लक्ष्यका साथ मैदानमा हुनेछ ।

आइतबार नै हुने अर्को खेलमा दिउँसो ३ः१५ बजे अमेरिका र नामिबियाले प्रतिस्पर्धा गर्दैछन् । नामिबिया पहिलो जितको खोजीमा हुनेछ भने अमेरिका दोस्रो जितको खोजिमा छ ।