काठमाडौँ । प्रमुख प्रतिपक्षी दल नेपाली कांग्रेसले राष्ट्रपति विद्यादेवी भण्डारीले फेरि प्रतिनिधि सभा विघटन गरेर असंवैधानिक, अलोकतान्त्रिक र राष्ट्रघाती काम गरेको बताएको छ । राष्ट्रपति भण्डारीले मध्यरात सरकारको सिफारिसमा प्रतिनिधि सभा विघटन गरी आगामी कात्तिक २६ र मंसिर ३ गते दुई चरणमा प्रतिनिधि सभा निर्वाचन गर्ने विज्ञप्ति जारी गरेकी थिइन् ।

त्यसपछि पार्टीको संस्थागत धारणा तय गर्न साढे नौ बजे पदाधिकारी बैठक बोलाएको छ । नेताहरूले यो निर्णयको चर्को विरोध गरेका छन् ।
वरिष्ठ नेता रामचन्द्र पौडेलले यो निर्णयले अलोकतान्त्रिक र राष्ट्रघाती कदम भन्दै त्यसविरुद्ध परिवर्तनलाई बचाउनेगरी पार्टीले निर्णय गर्ने बताए । उनले मेरोन्युजसँग भने, ‘सरकारको सिफारिसमा राष्ट्रपतिको निर्णय असंवैधानिक, अलोकतान्त्रिक र राष्ट्रघाती कदम हो । पदाधिकारी बैठकबाट निर्णय गरेर परिवर्तनलाई बचाउनेगरी कानुनीलगायतका सबै लडाइँ लड्छौं । पहिला एक्लै लडेका थियौं । अब परिवर्तन पक्षधर अन्य राजनीतिक दललाई पनि साथमा लिएर लड्छौ ।’

सभापति शेरबहादुर देउवा निकट नेता रमेश लेखकले राष्ट्रपति र प्रधानमन्त्रीले संविधान र लोकतान्त्रमाथि ठाडे आक्रमण गरेको बताए । उनले भने, ‘यो संविधान र लोकतान्त्रमाथिको ठाडै आक्रमण हो । राष्ट्रपति र प्रधानमन्त्रीले पदको चरम दुरुपयोग गरे । उनीहरूको हातबाट अब संघीय लोकतन्त्र र संविधानको संरक्षण हुन सक्दैन । त्यसविरुद्ध आन्दोलन गर्छौं ।’

युवा नेता गगन थापाले राष्ट्रपति र प्रधानमन्त्रीको असंवैधानिक हर्कतको संविधान मान्ने शक्तिहरू एक ठाँउमा आएर प्रतिरोध गर्नु पर्ने बताए । ‘प्रधानमन्त्री र राष्ट्रपति मिलेर गरेको हर्कतको हामीले तत्काल डटेर प्रतिवाद गरेनौं भने, अझ बढी हर्कत हुन्छन्,’ थापाले भने, ‘नहुने चुनावको घोषणा हो । महामारी नियन्त्रणमा काम गर्दैनन् । महामारीलाई निर्वाचन नगर्ने कारण बनाउँछन् । संविधान मान्ने शक्तिहरू एक ठाँउमा आएर यसको प्रतिरोध गर्नुपर्छ ।’

वरिष्ठ नेता पौडेलले महामारीको बेलामा संसद् विघटन गरेर चुना गर्छु भन्नु भन्दा विडम्बनापूर्ण कुरा केही हुन नसक्ने बताए । राष्ट्रपति विद्यादेवी भण्डारीले प्रधानमन्त्री पदका दाबी नपुग्ने भनी लिएको निर्णयलाई पनि पौडेलले संविधानविपरीतको क्रियाकलाप भएको आरोप लगाए ।
सांसदहरुको हस्ताक्षरसहित दाबी गएपछि हस्ताक्षरको सनाखतसमेत नगरी राष्ट्रपतिबाट षड्यन्त्रमूलक काम भएको उनको भनाइ छ ।