अमेरिकी राष्ट्रपति डोनाल्ड ट्रम्पले इरानलाई सीधा चेतावनी दिँदै मंगलबार राति “एउटा पूरै सभ्यता समाप्त हुन सक्ने” बताएका छन्।

ट्रम्पले इरानलाई सम्झौता गर्न वाशिङ्टन समयअनुसार मंगलबार राति ८ बजेसम्मको समय दिएका छन्। तर अहिलेसम्म इरानतर्फबाट कुनै सहमति भएको जानकारी आएको छैन।

यसैबीच ट्रम्पले आफ्नो सामाजिक सञ्जाल प्लेटफर्म ट्रुथ सोशलमा लेखेका छन्– “आज राति एउटा पूरै सभ्यता समाप्त हुनेछ, र फेरि कहिल्यै फर्केर आउने छैन।”

उनले थप लेखेका छन्, “म यस्तो होस् भन्ने चाहन्नँ, तर सम्भवतः त्यस्तै हुनेछ। तर अब पूर्ण र सम्पूर्ण शासन परिवर्तन भएपछि, जहाँ फरक, अझ बुद्धिमान र कम कट्टर विचार भएका मानिसहरू अघि बढ्छन्, सायद केही क्रान्तिकारी रूपमा अद्भुत हुन सक्छ।”

उनले भनेका छन्, “कसलाई थाहा ? हामी आज राति थाहा पाउनेछौं। यो विश्वको लामो र जटिल इतिहासको सबैभन्दा महत्वपूर्ण क्षणहरूमध्ये एक हुनेछ। ४७ वर्षको जबरजस्ती, भ्रष्टाचार र मृत्यु अन्ततः समाप्त हुनेछ। इरानका महान जनतालाई भगवानको आशीर्वाद रहोस्!”
ट्रम्पको अघिल्लो डेडलाइन मार्च २३ का लागि तय गरिएको थियो, तर त्यसपछि उनले पटक–पटक चेतावनी जारी गर्दै र कहिलेकाहीँ वार्ता सफल भएको दाबी गर्दै म्याद सार्दै आएका छन् ।

इरानले पछिल्लो सङ्घर्षविराम प्रस्ताव अस्वीकार गरेको इरानको सरकारी समाचार एजेन्सीले सोमबार रिपोर्ट गरेको छ । त्यसपछि ट्रम्पले चेतावनी दिँदै मङ्गलबार साँझ ८ बजेको म्याद अन्तिम हुन सक्ने सङ्केत दिएका छन् । उनले , “उहाँहरूलाई कुनै पुल, विद्युत गृह वा अन्य पूर्वाधार बाँकी रहँदैन ।”