काठमाडौँ । कोरोना भाइरस (कोभिड–१९)का कारण युनिभर्सल मेडिकल कलेज शिक्षण अस्पताल भैरहवामा कार्यरत एक चिकित्सकको निधन भएको छ । कपिलवस्तु घर भएका ३५ वर्षका फिजिसियन डा पशुपति रजौरियाको उपचारको क्रममा ग्राण्डी इन्टरनेसनल हस्पिटल काठमाडौंमा बुधबार राति निधन भएको हो ।

कोरोना संक्रमण पुष्टि भएपछि गत वैशाख २० गते युनिभर्सल मेडिकलमै उपचार गराएका रजौरियालाई चार दिनपछि हेलिकप्टरमार्फत काठमाडौँ ल्याइएको थियो । उनकी श्रीमती डा हसिना बानु पनि कोरोना संक्रमित थिइन् ।

डा बानु भने कोरोना संक्रमण मुक्त भइसकेकी छन् । हालसम्म मेडिकल कलेजमा एक सय ६० जना स्वास्थ्यकर्मी कोभिड संक्रमित भए पनि चिकित्सक मृत्यु भएको यो पहिलो घटना भएको अस्पतालले जनाएको छ ।