काठमाडौँ । जनता समाजवादी पार्टी जसपाको उपेन्द्र यादव पक्षले पार्टीका अर्को अध्यक्ष महन्थ ठाकुरले निर्वाचनमा आयोगमा फर्जी पत्र दर्ता गरेको आरोप लगाएको छ ।

ठाकुरले शुक्रवार निर्वाचन आयोगलाई २०७७ पुस ७ गतेको बैठकबाट कार्यकारिणी समिति हेरफेर, प्रमाणिकरण र पार्टीको आधिकारिक पत्राचारको अधिकार आफूलाई दिएको माइन्युट सहितको पत्र दर्ता गराएका थिए । यादव पक्षले यसप्रति गम्भिर ध्यानाकर्षण भएको बताएको छ ।

पार्टीका प्रचार विभाग प्रमुख डम्बर खतिवडाले शनिवार प्रेस विज्ञप्ति जारी गर्दै हुँदै नभएको निर्णयलाई निर्णय भनी किर्ते जालसाजी गरी महन्थ ठाकुरले निर्वाचन आयोगमा झुठा विवरण दर्ता गराएको आरोप लगाएका छन् ।

विज्ञप्तिमा भनिएको छ, “निर्वाचन आयोग,पार्टी पंक्ति र आमजनतालाई गुमराह गर्ने उद्देश्यले यस्ता नक्कली बैठक पुस्तिका तयार गरी गरिएको कार्य अनैतिक,गैरकानूनी तथा दण्डनीय कार्य हो । जसपाको पुस ७ गतको वैठकले गरेका निर्णय अध्यक्षद्धय यादव र ठाकुरको संयुक्त हस्ताक्षरद्धारा सार्वजनिक भएको र केन्द्रीय कार्यकारिणी हेरफेर तथा पुनर्गठन गर्ने अधिकार ठाकुरलाई दिने प्रस्ताव उक्त वैठकको कार्यसूचीमा थिएन । त्यस्तो कुनै निर्णय पनि भएको छैन । निर्वाचन आयोग, पार्टी पंक्ति र आम जनतालाई गुमराह गर्ने उद्देश्यले यस्ता नक्कली पुूस्तका तयार गरिएको कार्य अनैतिक, गैरकानुनी तथा दण्डनीय हो ।”

जसपाको विवाद अहिले निर्वाचन आयोगमा छ ।