काठमाडौँ । नेपाललाई चीन सरकारले कोरोना भाइरस (कोभिड–१९)विरुद्ध थप १६ लाख डोज खोप अनुदानमा दिने भएको छ । शुक्रबार अर्थमन्त्री जनार्दन शर्मासँग भेट गर्दै चिनियाँ राजदूत होउ यान्छीले यस्तो प्रतिबद्धता दिएकी हुन् ।

चीनले यसअघि १८ लाख डोज खोप अनुदानमा दिइसकेको छ । अर्थ मन्त्रालयले जारी गरेको विवरणमा चीनले दिने थप खोप चाँडै आउने जनाइएको छ ।

भेटमा नवनियुक्त अर्थमन्त्री शर्मालाई चिनियाँ राजदूत यान्छीले बधाई तथा शुभकामना दिएकी थिइन् । उनले जुनसुकै सरकार आए पनि नेपाललाई हेर्ने चिनियाँ नीतिमा परिवर्तन नहुने बताइन् ।

भूकम्पपछिको पुननिर्माणमा समेत चीनले नेपाललाई साथ दिएको जानकारी दिँदै आगामी दिनमा थप सहयोग गर्ने प्रतिबद्धता जनाएकी थिइन् ।