ओलीको प्रतिवेदनमाथि घनश्याम भुसालकाे फरक मत

बहुदलीय जनवाद ‘आँखा नदेख्नेले हात्ती छामेजस्तो’

मेरोन्यूज २०७८ असोज १० गते २०:३५

काठमाडौं । नेकपा एमालेका उपमहासचिव घनश्याम भुसालले पार्टी केन्द्रीय समिति बैठकमा पार्टी अध्यक्ष केपी शर्मा ओलीको प्रतिवेदनमाथि फरक मत राखेका छन् ।

भुसालले पार्टीको मार्गदर्शक सिद्धान्त ‘जनताको बहुदलीय जनवाद’’माथि प्रश्न उठाएका छन् ।

अध्यक्ष केपी शर्मा ओलीले पार्टी केन्द्रिय कमिटीमा पेश गरेको राजनीतिक प्रतिवेदनमाथि तीन बूँदे फरक मत राख्दै उपमहासचिव भुसालले जनताको बहुदलीय जनवाद परिभाषित नगरीकन अघि बढ्नै नसकिने तर्क पेश गरेका छन् ।

ललितपुरको च्यासलस्थित तुलसीलाल स्मृति भवनमा आईतबार सम्पन्न पार्टी केन्द्रिय कमिटीको बैठकपछि सञ्चारकर्मीसँग संक्षिप्त प्रतिक्रिया दिँदै उनले जनताको बहुदलीय जनवाद के हो ? भन्ने कुरा अहिलेसम्म परिभाषित नगरेको बताए ।

‘जनताको बहुदलीय जनवादको यत्रो कुरा गरेका छौं । तर त्यो के होे ? भन्ने कुरा नै नभनेर पनि जान सकिन्छ ? तसर्थ यो पनि हामीले परिपूर्ण गराऔं भन्ने मेरो कुरा हो ।’– उनले भने ।

उपमहासचिव भुसालले जनताको बहुदलीय जनवाद ‘आँखा नदेख्नेले हात्ती छामेजस्तो’ हुन नहुने टिप्पणी गरे ।

‘हामीले जनताको बहुदलीय जनवादको कुरा गरेका छौं । त्यो चाँही हामी जस्ले जे भन्छ, त्यो आँखा नदेख्नेले हात्ती छामेजस्तो जसले जे बुझ्यो, त्यही भयो । त्यसलाई परिभाषित गरेका छैनौं ।’ भुसालले भने ।

एमाले उपमहासचिव भुसालले कम्युनिष्ट आन्दोलनले ठूलो धक्का खानु परेको उल्लेख गर्दै त्यसमा आफै भित्रै रहेको कमजोरीको अध्यक्ष ओलीको राजनीतिक प्रतिवेदनमा समावेश नभएको भन्दै त्यसमा पनि फरक मत रहेको बताए ।

समाजवादमा जाने ठोस कार्यक्रम पनि अध्यक्ष ओलीको राजनीतिक प्रतिवेदनमा उल्लेख नगरिएकोमा पनि आफ्नो असहमति रहेको भुसालको भनाइ छ ।