एमसीसीबारे देउवाले मुख खोलेः पास गरिन्छ (भिडियोसहित)

भन्छन्– यो ऋण होइन, अनुदान हो

कैलाली । अमेरिकी सहयोग परियोजना एमसीसीबारे प्रमुख प्रतिपक्षी दलले सरकारको धारणा माग गरिरहँदा मौन रहेका प्रधानमन्त्री शेरबहादुर देउवाले सुदूरपश्चिमको धनगढी पुगेर मुख खोलेका छन् ।

सुदूरपश्चिम प्रदेशमा बाढी प्रभावित क्षेत्रको अवलोकनपछि धनगढीमा शुक्रबार बिहान भएको पत्रकार सम्मेलनमा सञ्चारकर्मीको जिज्ञासामा उनले एमसीसी पारित हुने स्पष्ट गरेका हुन् ।

उनले एमसीसी ऋण नभई ठूलो अनुदान भएको बताए । उनले यति ठूलो अनुदानको एमसिसीबारे झुठा प्रचार भइरहेको आरोप लगाए । यति ठूलो अनुदान आउँदा चाहिएन भन्नु गलत भएको बताए ।

एमसीसी नेपालको कानूनभन्दा माथि रहेको प्रचार गरिए पनि नेपालको कानूनभन्दा माथि नरहेको उनको भनाइ थियो । नेपालकै कानुनअनुसार नै एमसिसी अगाडि बढ्ने प्रधानमन्त्री देउवाको भनाइ छ ।

यसअघि सत्ता गठबन्धनकै अर्को दल जनता समाजवादी पार्टीले पनि एमसीसी पास गर्नुपर्ने बताइसकेको छ । जसपा संघीय परिषद् अध्यक्ष डा.बाबुराम भट्टराईले एमसीसीबारे अनावश्यक विवाद गरेको भन्दै तत्काल पास गर्नुपर्ने बताएका थिए ।