काठमाडौं । अभिनेत्री सुरविना कार्कीले ५ वर्षपछि नयाँ चलचित्र ‘काँडेतार’ हात पारेकी छन् । उनी नवल खड्काको निर्माण हुन लागेको चलचित्र ‘काँडेतार’ मा अनुबन्ध भएकी हुन् ।

राष्ट्र र राष्ट्रियताको विषयमा निर्माण हुन लागेको चलचित्रमा आफू आबद्ध हुन पाएकोमा सुरविनाले खुसी व्यक्त गरेकी छन् । उनीसहित यो चलचित्रमा नायक गौरव पहारी र नायिका रेविका गुरुङ अनुबन्ध भइसकेका छन् ।

सुरविनाले चलचित्र ‘झेली’ बाट अभिनेत्रीको रुपमा डेब्यू गरेकी हुन् । त्यसयता उनले आधा दर्जन फिल्ममा अभिनय गरे पनि करिअरले गति समात्न सकेको छैन । पहिलो लकडाउनमा अभिनय गरेको ‘के माया लाग्छ र ?’ गीतले उनलाई एकाएक चर्चामा ल्याएको थियो । यो गीतबाट उनी दर्शकमाझ धेरथोर चिनिएकी छन् ।

तिहारपछि छायाङकनमा निस्कने चलचित्रले नेपाल र भारतको सिमानामा काँडेतार लगाउनुपर्छ भन्ने विषय उठाउने निर्माता खड्काले जानकारी दिए । चलचित्रले राष्ट्रलाई झकझकाउने पनि उनको विश्वास छ ।

नेपाल र भारत सीमामा खिचिने यस चलचित्रलाई नवल र शंकर कार्कीले निर्देशन गर्नेछन् । कलाकार तथा निर्माता नवलले यसअघि पनि राष्ट्रियताको विषयमा ‘आवाज, दशगजा’ जस्ता चलचित्र बनाएका छन् ।