काठमाडौँ । पार्टीको १४ औँ महाधिवेशनमा होमिएको प्रमुख सत्तारुढ दल नेपाली कांग्रेसले आज ४२ जिल्लामा जिल्ला अधिवेशन गर्दै छ । एकभन्दा बढी संघीय निर्वाचन क्षेत्र भएका ४२ जिल्लामा आज जिल्ला अधिवेशन हुने कांग्रेसको केन्द्रीय निर्वाचन समितिले जनाएको छ । संघीय राजधानी रहेको काठमाडौँमा आज कांग्रेसको जिल्ला अधिवेशन हुँदै छ ।

अधिवेशन हुन लागेका ४२ जिल्लामा सभापति शेरबहादुर देउवा र वरिष्ठ नेता रामचन्द्र पौडेल समूहले प्यानल बनाएर प्रतिस्पर्धा गर्न लागेका छन् । केही जिल्लामा भने फरक प्यानल पनि देखिएका नेताहरुले बताएका छन् ।

काठमाडौँ, काभ्रेलगायत केही जिल्लामा सभापति देउवा र पूर्वमहामन्त्री कृष्णप्रसाद सिटौला पक्षको संयुक्त प्यानल बनेको छ । काठमाडौँमा नेता प्रकाशमान सिंह र केन्द्रीय सदस्य गगन थापा पक्षले संयुक्त रूपमा प्यानल बनाएका छन् । काठमाडौँमा सिंह–थापा प्यानलबाट वर्तमान सभापति कृष्णसबुज बानियाँ र उपेन्द्र कार्कीले प्रतिस्पर्धा गर्दै छन् ।

एकभन्दा बढी निर्वाचन क्षेत्र भएका चितवन र मकवानपुरलगायतमा अधिवेशन भने आज नहुने भएको छ । प्रदेश अधिवेशन हुने सातै प्रदेशका जिल्लाहरूमा व्यवस्थापनमा समस्या हुने भएपछि केही पर सारिएको हो । त्यसमा केन्द्रले पनि सहमति दिएको नेताहरुले बताएका छन् ।

चितवनमा एमालेको महाधिवेशन भएकाले जिल्ला अधिवेशन स्थगित गरिएको चितवन कांग्रेसले जनाएको छ । कांग्रेसले यही मंसिर १६ र १७ गते विराटनगर, जनकपुरधाम, हेटौँडा, पोखरा, बुटवल, सुर्खेत, धनगढीमा प्रदेश अधिवेशन गर्दै छ ।

अहिलेसम्म १६५ प्रतिनिधिसभा निर्वाचन क्षेत्रमध्ये १२६ मा प्रतिनिधिसभा क्षेत्रीय अधिवेशन सकिएको केन्द्रीय निर्वाचन समितिका सदस्य गोपालकृष्ण घिमिरेले जानकारी दिए । एक मात्र संघीय निर्वाचन क्षेत्र भएका जिल्लाहरूमा मंसिर ६ मा जिल्ला अधिवेशन भएको थियो । त्यसअघि १४ हिमाली जिल्लामा जिल्ला अधिवेशन सकिएका थिए ।

धनकुटा, रसुवा पर्सा, सर्लाहीलगायतमा अधिवेशन हुन सकिरहेको छैन । कांग्रेसले यही मंसिर २४ देखि २६ गतेसम्म काठमाडौँमा केन्द्रीय महाधिवेशन गर्ने कार्य तालिका निर्धारण गरेको छ ।