काठमाडौं । लुम्बिनी प्रदेश सभापतिको नेतृत्व हत्याउन संस्थापन र संस्थापन ईतर समुह आ आफ्नै तयारीका साथ अगाडी वढेका छन् ।

कांग्रेसको लुम्बिनी प्रदेशको अधिवेशनको उद्घाटन रुपन्देहीमा सुरु भएको छ । यस प्रदेशमा प्रदेश सभापतिका लागि संस्थापन पक्षबाट रुपन्देहीका संघीय सांसद एवं सार्वजनिक लेखा समिति सभापति भरतकुमार शाह र संस्थापनइतर पक्षबाट वरिष्ठ नेता रामचन्द्र पौडेल निकट रोल्पाका जिल्ला सभापति अमर पुनले उम्मेदवारी दिएका छन् । यस प्रदेशमा १२ जिल्ला रहेका छन् ।

जिल्लाको सभापतिको अंकगणित हेर्दा संस्थापनपक्षभन्दा इतर पक्ष बलियो देखिएका छन् । १२ जिल्ला मध्ये ९ जिल्लामा संस्थापनइतरले जिल्ला सभापति जितेको छ । रुपन्देही र बर्दियामा संस्थापन पक्षले जितेको छ । यस प्रदेशमा करिब १६ सय प्रदेश प्रतिनिधि रहेका छन् । पुनले भने ‘बीपी कोइरालाको विचार र सिद्धान्त बमोजिम पार्टी चलाउंन आफुले प्रदेश सभापतिमा उम्मेदवार दिएको हुँ ।’ पुन संविधान सभा सदस्य र पूर्व राज्यमन्त्री समेत हुन् ।

त्यसैगरी, संस्थापन पक्षबाट प्रदेश सभापतिमा उम्मेदवार बनेका शाह रुपन्देही ५ बाट लगातार तीनपटक जित्ने सांसद हुन् ।
पार्टीका दुबै पक्षलाई मिलाएर लैजान सक्ने स्वाभाव र क्षमता भएकाले आफ्नो जित निश्चित रहेको बताए । संस्थापनइतरले धेरै जिल्लामा जितेको देखिएपनि प्रदेशमा आफूले जित्ने दावी गरे ।

रुपन्देहीमा आफ्नो पक्षमा ५ वटा जिल्ला बराबरको मतदाता रहेका संस्थापनपक्षका नेताहरुको दाबी छ ।
आफूले गुटगत राजनीति नगर्ने तर्क गर्दै पार्टीका दुबै पक्षलाई मिलाएर लैजान सक्ने स्वाभाव र क्षमता आफुमा रहेको हुदाँ प्रदेश सभापति आफु्ले जित्ने दाबी गर्छन् ।

कांग्रेस प्रदेश अधिवेशनको निर्वाचन समितिको आज रातिसम्ममा नामावली प्रकाशन गरेर शुक्रबार उम्मेदवारी दर्ता र शनिबार मतदान गर्ने तयारी छ । पार्टीले गृहमन्त्री बालकृष्ण खांणलाई प्रदेश अधिवेशनको संयोजक तोकेको थियो भने संस्थापन ईतर समुहले चन्द्र भण्डारीलाई सभापति र पदाधिकारी छान्ने जिम्मेबारी दिएको थियो ।

१२ वटै जिल्लाका प्रतिनिधिसभा क्षेत्रबाट चुनिएका महाधिवेशन प्रतिनिधि, प्रदेशसभा क्षेत्रका क्षेत्रीय प्रतिनिधि, सम्बन्धित प्रदेशका केन्द्रीय सदस्यहरू र सांसद प्रदेश अधिवेशनका मतदाता हुने कांग्रेसको विधानमा उल्लेख छ ।