काठमाडौं । वागमती प्रदेशका मुख्यमन्त्री राजेन्द्र पाण्डेले मन्त्रिपरिषद विस्तार गर्दैछन् । मंगलवार साँझ ५ बजे मन्त्रीहरुको सपथ ग्रहणको कार्यक्रम तय भएको छ ।

कांग्रेस, माओवादी केन्द्र, एकीकृत समाजवादीको गठवन्धन सरकार बनेपछि मुख्यमन्त्रीमा नेकपा एकीकृत समाजवादीका नेता राजेन्द्र पाण्डे चयन भएका थिए । उनले सत्ता गठवन्धन दलका नेताहरुलाई मन्त्रालय भागवन्डा मिलाउन नसक्दा मन्त्रालय टुक्राएरै विस्तार गर्न लागेका हुन् । वागमती प्रदेशमा हाल मुख्यमन्त्रीसहित ५ सदस्यीय मन्त्रिपरिषद छ । मन्त्रालय टुक्राएर अहिले संख्या ८ बाट बढाएर १४ पुर्‍याइएको छ ।

नेकपा माओवादी केन्द्र र नेकपा एकीकृत समाजवादीले भने विस्तार हुने मन्त्रीहरुको नाम टुंग्गो लगाईसकेको छ भने कांग्रेसले अझै टुग्गाउन बाँकी छ ।

मन्त्रीहरुको नाम टुंग्गो लागेपनि उनीहरुले पाउने मन्त्रालयका विषयमा भने अझै छलफल हुन वाँकी रहेको मन्त्री हुन लागेका माओवादी केन्द्रका सांसद रत्न ढकालले मेरोन्यूजलाई जानकारी दिए ।

माओवादी केन्द्रबाट दोलखाका विशाल खड्का, काभ्रेका रत्न ढकाल र चितवनका घनश्याम दाहाल मन्त्री बन्ने छन् ।

त्यस्तै नेकपा एकीकृत समाजवादीबाट बसुन्धरा हुमागाईं र बसन्त मानन्धर मन्त्री बन्ने छन् ।