प्रचण्डको प्रतिवेदन सर्वसम्मत पारित

माओवादीको महाधिवेशन

प्रचण्डको प्रतिवेदन सर्वसम्मत पारित

चुनावपछि विशेष महाधिवेशन गर्ने, न्यौपानेको फरक मत प्रतिवेदनकै रुपमा नआएपनि स्वीकार गर्ने

मेरोन्यूज २०७८ पुष १६ गते १६:५०

नेकपा माओवादी केन्द्रको जारी आठौं महाधिवेशनले अध्यक्ष पुष्पकमल दाहाल प्रचण्डको वैचारिक तथा राजनीतिक प्रतिवेदन पारित गरेको छ । प्रतिवेदनमाथि उठेका प्रश्नको जवाफ अध्यक्ष प्रचण्डले दिएपछि बन्दसत्रले पारित गरेको हो । प्रचण्डले एक्काइशौं शताब्दीको समाजवादको नेपाली बाटो शीर्षकमा ४५ पेजको दस्तावेज गत सोमबार वन्दशत्र हलमा दुई घण्टा १८ मिनेट लगाएर वाचन गरेका थिए ।

प्रचण्डले आफनो दस्तावेज आफैमा पूर्ण नभएको भन्दै त्यसलाई थप परिमार्जन र विकसित गर्नका लागि आउने चुनाव लगत्तै विशेष महाधिवेशन आयोजना गरेर संगठनामा रुपान्तरण र विचारमा अझ विकास गरेर लैजाने वताएका थिए ।

उनले एमसीसीका बारेमा प्रतिवेदनमा जे आएको छ, त्यही रुपमा वुझन पनि आग्रह गरेका थिए । त्यस्तै दलहरुको वर्ग विश्लेषण गर्ने विषय अहिले अप्ठ्यारो रहेको भन्दै अवस्था वुझिदिन महाधिवेशन प्रतिनिधिलाई आग्रह गरेका थिए ।

तर, प्रतिवेदनमाथि छुट्टाछुट्टै प्रस्तुत गरिएका नेतात्रय राम कार्की, लेखनाथ न्यौपाने र हरिबोल गजुरेलको पुरक र फरक मत प्रस्तावबारे अध्यक्ष प्रचण्डले केही बोलेनन् । न्यौपानेको प्रस्तावमा प्रचण्डले लेखनाथ न्यौपानेको मतलाई स्वीकार गदै त्यसलाई आवश्यकता अनुसार छलफलमा लैजाने बताए । उनले न्यौपानेको मतलाई दस्तावेजको मूर्त रुपमा नआएको तर स्थायी समितिले छलफल गरेको बताए ।

न्यौपानेको भिन्न मतलाई स्वीकार गरेपनि प्रचण्डले विषय सार्वजनिक गर्ने प्रक्रियामा भने प्रश्न उठाएका थिए । उनले राम कार्कीको पुरक प्रस्तावलाई स्थायी समितिमा ल्याएर दिएको र त्यसलाई छलफल समेत गरिएको भन्द्र न्यौपानेको भने फरक मत सिधै वाहिर प्रचारमा गएकोले प्रक्रियागत रपमा मिलाउन आग्रह गरेका थिए । उनले अब प्रचण्डपथ ब्यूताउने कुरा अहिले नहुने पनि वताएका छन् ।

गत आइतबारबाट सुरु भएको महाधिवेशनको दोस्रो दिन सोमबार अध्यक्ष प्रचण्डले वैचारिक र राजनीतिक प्रतिवेदन तथा नेता देव गुरुङले विधान मस्यौदा पेस गरेका थिए । उक्त प्रतिवेदनमाथि मंगलबार २५ वटा समूहमा छलफल भएर बुधबार र बिहीबार दुई दिन समूहका नेताहरूले आ–आफ्नो समूहको सुझावसहित निष्कर्ष पेस गरेका थिए ।

तत् पश्चात शुक्रबार अध्यक्ष प्रचण्डले जवाफ दिएपछि प्रतिवेदन पारित गरेको हो । जारी महाधिवेशनले १५ पदाधिकारीसहित २९९ कार्यसमिति चयन गर्नेछ ।