काठमाडौँ । सहिद स्मारक ‘ए’ डिभिजन लिग अन्तर्गत शनिवार तीन वटा खेल हुँदैछ ।

काठमाडौंको दशरथ रंगशालामा हुने पहिलो खेलमा थ्री स्टारले जावलाखेल युथ क्लबको सामना गर्नेछ । दोस्रो खेलमा आज मनाङ मस्र्याङ्दी र ब्रिगेड ब्वाइज भिड्ने छन् भने आजै हुने तेस्रो खेल संकटा र च्यासलबीच हुनेछ ।

मनाङ र ब्रिगेड ब्वाइजबीचको खेल भने पोखरामा हुनेछ ।

थ्री स्टार ६ खेलबाट ७ अंक जोडेर आठौं स्थानमा छ भने जावलाखेल ६ खेलबाट समान ७ अंकमा नवौं स्थानमा छ ।

मनाङ ६ खेलबाट १३ अंकसहित दोस्रो स्थानमा छ । उसमाथि एएफसी कप छनोट खेल्नका लागि यो खेल जित्नै पर्ने दबाब छ । ब्रिगेड ब्वाइज ६ खेलबाट ५ अंकमा १२ औं स्थानमा छ ।

तेस्रो स्थानमा रहेको संकटाको ६ खेलबाट १२ अंक छ । च्यासल भने समान ६ खेलबाट ४ अंकमै सीमित रहेर १३ औं स्थानमा छ ।

शुक्रबार सातौँ चरणको खेलमा एनआरटीले फ्रेन्ड्स क्लबलाई ३–२ ले पराजित गरेको थियो भने विभागीय टोली एपीएफ र आमीले एक एक गोल गरी बराबरी भएपछि अंक बाँडेका थिए ।